Leiđsöguhundurinn Sebastían mćttur til starfa á Patreksfirđi

Þann 30. janúar síðastliðinn var fyrsti leiðsöguhundur Þjónustu- og þekkingarmiðstöðvar fyrir blinda, sjónskerta og daufblinda einstaklinga formlega afhentur við athöfn á Patreksfirði. Hundurinn, sem er af Golden Retriever kyni og  heitir Sebastían, fór til hins nýja félaga síns á Patreksfirði,  en Sebastían hefur verið úthlutað til Fríðu Eyrúnar Sæmundsdóttur.

 

Sebastían er fyrsti leiðsöguhundurinn sem Þjónustu- og þekkingarmiðstöðin úthlutar en hann er íslenskur hundur og þjálfaður á Íslandi, ólíkt þeim leiðsöguhundum sem nú þegar eru í notkun, en þeir hafa allir komið erlendis frá. Mikil vinna felst í þjálfun leiðsöguhunda og hefur Sebastían verið í þjálfun hjá leiðsöguhundaþjálfara Miðstöðvarinnar, Drífu Gestsdóttur,  undanfarið ár.

 

Óhætt er að segja að Sebastían muni hafa mikil áhrif á sjálfstæði Fríðu, sem er einungis 38 ára gömul, en hún missti sjónina nýlega af völdum sykursýki.

 

Þjónustu- og þekkingarmiðstöð fyrir blinda, sjónskerta og daufblinda einstaklinga hefur í samvinnu við Blindrafélagið unnið að þróunarverkefni með leiðsöguhunda, sem felst í kaupum og þjálfun á íslenskum hundum. Þörfin fyrir leiðsöguhunda er mikil og Sebastían er sjötti leiðsöguhundurinn sem verður í notkun á Íslandi núna en áætlað er að a.m.k. 16 hundar þurfi að vera í notkun á hverjum tíma til að uppfylla þörfina fyrir leiðsöguhunda.

 

Blindrafélagið hefur staðið dyggilega á bak við verkefnið með fjáröflun, meðal annars með sölu dagatala, en allar myndir í dagatalinu eru af núverandi leiðsöguhundum, unghundum í þjálfun og hvolpum sem keyptir hafa verið í verkefnið.

 

Hér eru svör við nokkrum spurningum um umgengni við leiðsöguhunda.

Skrifađu athugasemd:



Til baka
Vesturbyggđ - Kt. 510694-2369 - Ađalstrćti 63 - 450 Patreksfirđi - Sími: 450 2300 - Fax: 456 1142 - Netfang: vesturbyggd@vesturbyggd.is