Það er mikilvægt að bæjarstjórnin sýni þessa samstöðu þar sem fyrir eru erfiðir tímar í samfélaginu og ekki síst í rekstri sveitarfélaga. Í þessari stefnuræðu er gert grein fyrir þeim verkefnum sem bæjarstjórnin hefur samþykkt að fara í á næsta ári og þeim aðgerðum til að lækka kostnað.

Nokkrar lykiltölur fyrir árið:

• Reksturinn fyrir fjármagnsliði er jákvæður um 84 milljónir. Var 27 milljónir í fjárhagsáætlun 2011.
• Fjármagnsliðir eru 93 milljónir en voru 73 milljónir í fyrra.
• Rekstrarniðurstaðan er neikvæð um 9 milljónir en var neikvæð um 46 milljónir í fjárhagsáætlun 2011.
• Veltufé frá rekstri er áætlað 93 milljónir kr. en var 41 milljón kr. í fjárhagsáætlun 2011
• Gert er ráð fyrir 4% hækkun verðlags milli fjárhagsára.
• Gert er ráð fyrir 4,2% breytingum á meðalgengi.

Fyrr á þessu ári gerði Vesturbyggð samkomulag við Eftirlitsnefnd um fjármál sveitarfélaga þar sem sveitarfélaginu var gert að hagræða í rekstri til að koma í veg fyrir frekari fjárhagsleg vandræði sem sveitarfélagið hefur búið við í áratugi. Gerð hefur verið úttekt á rekstrinum af Ólafi Sveinssyni hagverkfræðingi og gerðar tillögur að sparnaði og breytingum á fyrirkomulagi til að draga úr kostnaði. Ólafur fundaði með forstöðumönnum stofnana og er meginhluti af þeim tillögum sem kynntar eru hér í dag í tillögur forstöðumanna. Sumar tillagnanna hafa komist nú þegar í framkvæmd en aðrar munu leiða til sparnaðar á næstu árum.

Í stefnuræðu síðasta árs gat ég þess að úttekt yrði gerð á orkukostnaði sveitarfélagsins enda er sveitarfélagið að greiða um 34 milljónir í orkukostnað á ári sem er um 4% heildartekjum sveitarfélagsins. Verkfræðistofan Afl og orka var fengin til þessa verks og hafa þeir nú þegar gert tillögu að breytingum til orkusparnaðar. Eins eru í deiglunni samstarfsverkefni við framleiðendur ofnloka til þess að draga úr kostnaði sem kynnt verður síðar. Gert er ráð fyrir að íbúar geti tekið þátt í því verkefni.

Líkt og á síðasta ári var íbúum boðið að koma að fjárhagsáætlunargerðinni með því að taka þátt í þremur fundum sem haldnir voru í öllum byggðakjörnunum. Voru íbúar spurðir hvernig auka mætti lífsgæði í Vesturbyggð. Fjölmargar góðar hugmyndir komu fram sem nýttar voru við áætlunargerðina og ekki síður komu fram góðar hugmyndir á síðasta ári sem notaðar voru þá og aftur nú.

Við fjárhagsáætlunargerðina er að sjálfsögðu farið eftir tillögu ráðgjafa sveitarfélagsins og Eftirlitsnefndar um fjármál sveitarfélaga, tillagna forstöðumanna og fagnefnda. Ég vil nota tækifærið og þakka þeim íbúum sem tóku þátt í vinnunni sérstaklega en ekki síður fagnefndum sem hafa lagt á sig mikla vinnu. Þá bera að þakka bæjarstjórn Vesturbyggðar fyrir þá miklu vinnu sem hún hefur lagt á sig við fjárhagsáætlunargerðina. Það er alls ekki algilt að sveitarstjórnir standi heilar á bak við fjárhagsáætlanir. Enn sem fyrr hafa bæjarfulltrúar sýnt þann þroska og ábyrgð að vinna að áætluninni saman.

Fjárhagur sveitarfélagsins er þungur enda verkefnin mörg, þjónustan mikil en íbúar fáir. Miklar launahækkanir voru á síðasta ári sem ekki var gert ráð fyrir. Þrátt fyrir það var reksturinn nánast á fjárhagsáætlun á líðandi ári. Það er óumflýjanlegt að gera miklar breytingar á rekstrinum til að ná fram hagræðingu og sparnaði í rekstrinum. Jafnframt verður leitast við að skerða sem minnst þjónustu við íbúa en samt sem áður gera nauðsynlegar breytingar líkt og önnur sveitarfélög hafa verið að gera. Ljóst er að tíma tekur að draga úr kostnaði í sumum málaflokkum en hér er reynt að hagræða eins og best kemur út. Þó verður að taka fram að sumar aðgerðir eru tímabundnar. Bæjarstjórn ber þá von í brjósti að sveitarfélagið muni rétta úr kútnum í náinni framtíð, öll teikn eru á lofti þar um.

Í dag eru skuldir sveitarfélagsins Vesturbyggðar um 1340 milljónir sem er of há fjárhæð. Fjármagnsgjöld eru áætluð um 93 milljónir á næsta ári. Tekjur hafa jafnframt farið minnkandi undanfarin ár en á síðasta ári voru útsvarstekjur þó aðeins hærri en gert var ráð fyrir og er það vel. Útsvarstekjur hafa þó lækkað umtalsvert sl. ár vegna fólksfækkunar. Rétt er að taka það fram að líkur eru á að íbúum hafi fjölgað um ríflega einn tug á þessu ári.

Enn sem fyrr þurfa sveitarfélög að kvarta undan ríkisvaldinu vegna einhliða ákvarðana sem bitna á sveitarfélögunum. Minnkandi framlög úr Jöfnunarsjóði sem tilkynnt er um allt of seint. Auk þess veltir ríkisvaldið verkefnum sínum yfir á sveitarfélögin og litlar sem engar tekjur fylgja með. Ég leyfi mér að endurtaka orð mín frá síðasta ári: „Það er óþolandi að þegar ríkið gerir kröfu til sveitarfélaga um fjárhagsáætlun til þriggja ára í senn, þá geti það sjálft ekki gert slíkt hið sama. Sveitarfélögin verða að mótmæla þessari framkomu kröftuglega." Lítið virðist breytast í þessum efnum.

Í fjárhagsáætlun fyrra árs var gert ráð fyrir að unnið yrði að skuldbreytingu lána og óhagkvæm lán endurfjármögnuð. Þrátt fyrir mikla vinnu, mikinn þrýsting og utanaðkomandi aðstoð sérfræðinga og stjórnmálamanna þokast sú vinna hægt. Enginn skilningur, fullkomið úrræðaleysi og ákvarðanatökufælni er hjá bankastofnunum og þetta bitnar allt á neytendum. Í dag eru stærstu lánadrottnar sveitarfélagsins annarsvegar Lánasjóður sveitarfélaga og hins vegar Íbúðalánasjóður vegna Fasteigna Vesturbyggðar. Aðrir stórir lánadrottnar eru Byggðastofnun og Landsbankinn. Er það vegna lána sem stofnað var til á 9. áratug síðustu aldar, fyrir sameiningu sveitarfélaga í Vesturbyggð og síðan til aukningar stofnfjárhlutar Vesturbyggðar í Sparisjóði Vestfirðinga. Það lán lækkaði um tæplega 50% eftir hinn svokallaða MótorMax dóm sem dæmdi lánið ólögmætt gengislán. Nú er aftur komin upp réttaróvissa í þessu máli vegna hæstaréttardóms þar sem lán frá Glitni voru dæmd ólöglega vegna lána til kaupa á stofnfjárbréfum í Byr Sparisjóði. Sveitarfélagið mun að sjálfsögðu gæta allra sinna réttinda í þessu máli.

Þrátt fyrir erfiða skuldastöðu er rétt að sýna bjartsýni og gera ráð fyrir að þessi staða sé einungis tímabundin. Þetta gengur yfir eins og hver önnur bræla.

Aðgerðir til að rétta af stöðu bæjarsjóðs

Þær aðgerðir sem bæjarstjórn hyggst grípa til á yfirstandandi kjörtímabili í því skyni að rétta af stöðu bæjarsjóðs eru í fimm liðum og erframhald frá fyrri fjárhagsáætlun:

1. Aðhald í rekstri og fjárhagsleg endurskipulagning
2. Tekjuaukning
3. Skipulagsbreytingar
4. Forgangsröðun verkefna
5. Niðurgreiðsla skulda

1. Fjárhagsleg endurskipulagning

Farið hefur verið í saumana á öllum rekstri sveitarfélagsins.

• Sett verður innkaupastefna fyrir sveitarfélagiðog sú krafa gerðað ávallt sé leitað hagstæðustu verða hverju sinni.
• Launakostnaður verður skoðaður sérstaklega hjá öllum stofnunum og deildum og reynt af fremsta megni að minnka yfirvinnu og bæta nýtingu mannafla. Gert er ráð fyrir samningsbundnum hækkunum.
• Reynt verður að komast hjá því að ráða fólk í störf ef hægt er. Í sumum tilvikum verður dregið úr þjónustu sem ekki er lögbundin.
  
• Sú krafa verður gerð tilforstöðumanna að þeir gætiítrasta aðhalds í rekstrinum. Sérstakt átak verður gert til að fylgjast með rekstrinum frá einum mánuði til þess næsta. Framúrkeyrsla úr fjárhagsáætlun er ekki leyfileg.

Reynt verður að semja um endurfjármögnun óhagkvæmra lána og kjör skammtímalána enda er fjármagnskostnaður helsta vandamálið í rekstri sveitarfélagsins.

2. Tekjuaukning

Nauðsynlegt mun reynast að hækka þjónustutekjur með því að leiðrétta gjaldskrár svo þær verði í samræmi við gjaldskrár annarra sveitarfélaga. Heilt yfir eru í flestum tilfellum 5-15% gjaldskrárhækkun sem er það sama og önnur sveitarfélög munu gera á næstunni.

Reynt verður af fremsta megni að laða íbúa og fyrirtæki til Vesturbyggðar til varanlegrar búsetu. Það gerum við öll með samstilltu átaki. Gert er ráð fyrir tekjuaukningu hjá Höfnum Vesturbyggðar vegna meiri umsvifa. Þá er gert ráð fyrir auknum útsvarstekjum. Þessar áætlanir eru þó mjög varfærnar.

3. Skipulagsbreytingar

Á síðasta ári voru boðaðar skipulagsbreytingar á starfsemi sveitarfélagsins. Unnið er að þeim og einnig er unnið að starfsmannastefnuen sótt var um styrk til Sveitamennt og Starfsmenntar til þess og félagsmálastjóri er að klára jafnréttisstefnu fyrir Vesturbyggð og Tálknafjarðarhrepp. Er þeim ætlað að auka faglega stjórnsýslu, stytta ferla og boðleiðir og dreifa álagi.

4. Forgangsröðun verkefna

Við fjárhagsáætlunina er gert ráð fyrir að verkefnum verði forgangsraðað. Öll verkefnin eru mikilvæg en nauðsynlegt er að fara rækilega yfir einstök verkefni sem ekki geta beðið. Í þessari áætlun hafa forstöðumenn gert tillögur að forgangsröðun sem tekið er tillit til.

5. Niðurgreiðsla á skuldum

Gert er ráð fyrir að skuldir verði greiddar niður um 45milljónir á árinu 2012. Það verður að teljast gott eins og fjárhagsstaðan er. Farið verður í skuldalækkun með sértækum aðgerðum og vaxtakjör leiðrétt. Unnið er að endurfjármögnun skulda í samráði við Lánasjóð sveitarfélaga og Eftirlitsnefnd um fjármál sveitarfélaga. Lánstraust hjá Lánasjóði sveitarfélaga skiptir sveitarfélagið öllu máli enda býður sjóðurinn mun betri kjör en aðrar lánastofnanir.

Skatttekjur

Tekjur Vesturbyggðar skv. tekjustofnalögum eru áætlaðar 548milljónir á næsta ári. Það er nokkur hækkun frá árinu 2010 sem skýrist af hækkandi útsvari og fasteignasköttum.

Útsvar

Fjárhagsáætlun gerir ráð fyrir að útsvarstekjur sveitarfélagsins verði 318milljónir kr. sem er hækkun frá síðasta ári vegna íbúafjölgunar, hækkandi útsvars vegna tillags vegna málefna fatlaðra. Útsvarsálagning er fullnýtt eða 14,48%.
Jöfnunarsjóður sveitarfélaga

Reiknað er með að framlög úr Jöfnunarsjóði sveitarfélaga verði 181 milljónir kr., semívið hærritala en áætlað er á þessu ári. Nokkur óvissa er þó um framlögin frá sjóðnumá komandi ári. .

Fasteignaskattur

Álagningarstuðlar fasteignagjalda hækka milli ára sem og sorpgjöld.
Fasteignaskattur er áætlaður 37 milljónir króna sem er talsverð hækkun frá fyrra ári enda hefur fasteignamat hækkað sem er vel. Fasteignamat í Vesturbyggð er þó enn eitt það lægsta á landinu.Lóðaleiga er áætluð 13 milljónir.

• Fasteignaskattur á almennt húsnæði verður 0,525% .
• Opinberar stofnanir: 1,32 % og atvinnuhúsnæði 1,65% eða óbreytt á milli ára.
• Vatnsgjald hækkar á íbúðarhúsnæði og verður 0,40% en óbreytt eða 0,50% á atvinnuhúsnæði.
  
• Holræsagjöld hækka og verða 0,33%.

Veittur er 100 % afsláttur af fasteignaskatti til eldri borgara og örorkulífeyrisþega:

• Einstaklingar með árstekjur allt að 2.143 þús. kr.
• Hjón með árstekjur allt að 2.977 þús. kr.
  

Auk þess verður 70% afsláttur veittur:

• Til einstaklinga með tekjur frá 2.143-2.704 þús. kr.
• Til hjóna með tekjur frá 2.977 þús. kr.-3.786 þús. kr.

Samdar verða reglur um styrki til greiðslu fasteignaskatts og holræsagjalds til íþróttafélaga, björgunarsveita og félagasamtaka sem sinna menningarstarfsemi.

Útgjaldaliðir

02 Félagsþjónusta

Miklar breytingar voru gerðar á Félagsþjónustu Vestur-Barðarstrandarsýslu á þessu ári. Félagsþjónustan hefur verið sameiginleg með Tálknafjarðarhreppi sem hefur gengið vel. Nú er gert ráð fyrir að sameina félagsmálanefnd og barnaverndarnefnd og mun hagræðið verða óneitanlega mikið af því.

Útgjöld til félagsþjónustu í Vesturbyggð hafa verið tiltölulega lítil á landsvísu en á síðasta ári hefur orðið mikil aukning á fjárhagslegri aðstoð. Ef ekki verða miklar breytingar almennt í samfélaginu má gera ráð fyrir að þessi liður geti vaxið þrátt fyrir gott atvinnuástand hér í Vesturbyggð.

Ekki er gert ráð fyrir breytingum á félagsstarfi fyrir aldraða frá því sem nú er. Í skoðun er samstarf við Heilbrigðisstofnun PatreksfjarðarogVelferðarráðuneytið um framtíðarskipan í öldrunarmálum. Aðstaða sem íbúar Kambs hafa lengi barist fyrir, lyfta við húsið, verður sett upp á nýju ári, en því var lofað á síðasta ári. Kostnaður við framkvæmdina er mjög mikill og er fjármögnun þess verkefnis nú lokið en Vestur-Botn ehf. mun fjármagnaverkefnið.

Boðað er að óbreyttar reglur gildi um kostnaðarþátttöku ríkisins í húsaleigubótum og þess vegna er gert ráð fyrir að áfram verði greiddar húsaleigubætur samkvæmt núgildandi reglum.

04 Fræðslu- og uppeldismál

Fræðslu-og uppeldismál er útgjaldafrekasti málaflokkur allra sveitarfélaga og eru þau flest að skoða hvernig megi draga úr kostnaði en jafnframt að viðhalda gæðum þjónustunnar. Umræða um samrekstur og sameiginlega yfirstjórn skóla hefur verið mjög fyrirferðamikil í samfélaginu undanfarið. Bæjarstjórn leggur ríka áherslu á að styðja við bakið á fræðslumálum.

Hagræðingar í rekstrinum og skipulagsbreytingar er þáttur í að efla skólastarfið til lengri tíma.Tveir starfsmenn hættu vegna aldurs á þessu ári og var ekki ráðið nema að hluta í stöðu annars þeirra, en það er hagkvæmara en að greiða yfirvinnu. Vesturbyggð mun áfram styðja við bakið á þeim starfsmönnum sem ætla sér að ná í kennararéttindi (BEd).Þetta verður gert í samstarfi við skólastjórnendur þannig að viðbótarkostnaður skapist ekki og einnig verður sett takmörk um hámarksfjölda einstaklinga á ári hverju. Heildarútgjöld til fræðslumála eru áætlaðar 250 milljónir.

Það er mikilvægt fyrir skóla Vesturbyggðar að fá fagmenntaða einstaklinga til starfa, það styrkir skólastarfið. Það er einnig nauðsynlegt að byggja upp metnað í samfélaginu, að íbúar hafi meirimetnað fyrir góðri menntun og þar með góðum skólum. Bestu skólar heims eru starfræktir í örsmáum bæjum. Fylgnin milli gæða skólastarfs og fjármagnsins sem til hans renna fylgist ekki alltaf að, þó svo að vissulega skipti það máli.Gæðin felast í starfinu og mannauðnum. Þess vegna skiptir það máli að hafa vel menntað starfsfólk. Mikið var hlegið þegar Háskóli Íslands tilkynnti að hann ætlaði sér að verða einn af 100 bestu háskólum heims. Nú á aldarafmæli skólans var tilkynnt að HÍ væri kominn í hóp 300 bestu skóla heims og vermir þar bekki með frægustu skólum heims sem starfað hafa í 300-500 ár. Þetta staðfestir að sá litli getur. Framúrskarandi skóli er grunnurinn að öflugu og eftirsóknarverðu samfélagi.

Grunnskóli Vesturbyggðar

Lagðar eru til nokkrar skipulagsbreytingar og almennar hagræðingarkröfur til að lækka kostnað almennt.

Tónlistarskóli Vesturbyggðar

Tónlistarskóli Vesturbyggðar var færður úr húsnæði við Stekka 21 í húsnæði í Patreksskóla og húsnæðið leigt út. Mikil hagræðing felst í þessu ogekki síst betri þjónusta við notendur auk þess aðmeiri tengsl munu skapast við Grunnskóla Vesturbyggðar. Eins verður að líta til þeirra fjölbreyttu tækifæra sem munu án efa skapast með þessum samrekstri. Húsnæðið að Stekkum 21 hefur verið auglýst til sölu, en þar til verður það í útleigu.
Gjaldskrá Tónlistarskólans verður hækkuð á nýju ári um 15% og þar með samræmd við aðra skóla á landsbyggðinni.

Leikskólar Vesturbyggðar

Leikskólar verða áfram reknir á Bíldudal og Patreksfirði. Það ánægjulega hefur gerst að talsverð fjölgun barna er í leikskólunum og líkur er á að þau verði tæplega 50 eftir áramót. Gjaldskrárhækkanir í leikskóla eru 7% en þær eru nauðsynlegar vegna hækkandi launa, matarverðs og almenns verðlags. Leikskólagjöld í Vesturbyggð eru samt sem áður svipuð og gengur og gerist í öðrum sveitarfélögum. Aðstaða á Arakletti og Tjarnarbrekku verður bætt svo hægt verði að framfylgja nýjum leikskólareglum í Vesturbyggð þar sem gert er ráð fyrir að börn 14 mánaða og eldri fái leikskólapláss.

05 Menningarmál

Ekki er gert ráð fyrir miklum breytingum á rekstri bókasafnanna á Patreksfirði og Bíldudal. Þó hefur verið fækkað um einn starfsmann á bókasafninu. Gert er ráð fyrir 7% hækkun á gjaldskrá milli ára.

Skjaldborgarbíóið er þáttur í menningarlífi sveitarfélagsins. Lionsmenn og áhugasamir einstaklingar hafa sýnt bíóinu mikinn stuðning og velvilja sem ber að þakka. Ekki verða gerðar miklar breytingar á þeim rekstri.

Unnið er að endurskoðun á starfsemi Minjasafnsins á Hnjóti í samráði við Þjóðminjasafnið og aðra hagsmunaaðila. Mikilvægt er að ná rekstrargrundvelli safnsins á réttan kjöl en vandinn hefur verið umtalsverður undanfarin ár. Framlag Vesturbyggðar er því hækkað í 3,1 milljón króna á næsta ári.

06 Æskulýðs- og íþróttamál

Æskulýðs-og íþróttamál er annar stærsti málaflokkur sveitarfélagsins. Heildarútgjöld þess málaflokks eru rúmar 91 milljónir kr. Undir málaflokkinn falla rekstur íþróttamiðstöðva og sundlauga, félagsmiðstöðvar, vinnuskóli og stuðningur við íþróttafélög í Vesturbyggð.

Gert er ráð fyrir að stytta opnunartíma Bröttuhlíðar um klukkutíma á morgnana og áfram verður öðrum heita pottinum lokað.Leitað verður allra leiða til að lækka hitunar-og lýsingarkostnað í íþróttamiðstöðvunum sem er snar þáttur í rekstri þeirra.

Ekki er gert ráð fyrir breytingum á vinnuskólanum frá fyrra á ári enda hefur börnum fækkað sem sækja vinnuskólann.

Ekki er gert ráð fyrir breytingu á opnunartíma félagsmiðstöðvarinnar Vest-end. Stutt verður áfram fjárhagslega við starf félagsmiðstöðvar á Bíldudal. Nokkur lækkun er lögð fram á styrkjum við íþróttafélögin.

07 Brunamál og almannavarnir

Brunavarnir á sunnanverðum Vestfjörðum voru til skamms tíma í miklum ólestri. Síðustu ár hefur mikið og gott starf verið unnið, m.a. í markvissu fyrirbyggjandi starfi. Í úttekt EFS er gerð athugasemd við háan kostnað við málaflokkinn enda er kostnaður Vesturbyggðar við málaflokkinn mun hærri en hjá öðrum sveitarfélögum af sömu stærðargráðu. Heildarútgjöld málaflokksins eru áætluð tæpar 17 milljónir kr.Fjárhagsáætlun ársinsgerir ráð fyrir breytingum á fyrirkomulagi og umfangi aukraunkostnaðarlækkunar.

• Gera verður breytingar á starfsemi slökkviliðs og slökkviliðsstjóra sem er sameiginlegur með Tálknafjarðarhreppi á grundvelli breyttra forsenda.
  
• Sett verður þak á fjölda æfinga slökkviliða á árinu.
  
• Viðhaldi verður haldið í lágmarki, forgangsraðað og aðgerðaáætlun fyrir næstu ár unnin miðað við breyttar forsendur.
  
• Lagt verður aukið fjármagn í búnaðarkaup en hann er orðinn gamall og löngu er kominn tími á endurnýjun.
  

Ofanflóðavörum á Bíldudal er lokið.Haldið verður áfram við hönnun snjóflóðavarnargarða á Patreksfirði og gert er ráð fyrir að framkvæmdir hefjist á vordögum 2012.Sú framkvæmd verður ein sú viðamesta í Vesturbyggð í áraraðir og mun hafa mikil margfeldisáhrif á svæðinu. Ofanflóðasjóður kostar 90% af þeim kostnaði en áætlaður kostnaður er um 300 milljónir.

08 Hreinlætismál

Kostnaður við sorphirðingu og sorpförgun hefur farið vaxandi á undanförnum árum og var málaflokkurinn allt of dýr miðað við umfang.Heildarkostnaður við málaflokkinn er áætlaður tæpar 7 milljónir kr. Vesturbyggðhefurí áraraðir greitt með þjónustunni sem er óeðlilegt, ef ekki ólöglegt. Á síðasta ári var breytt um fyrirkomulag og sorpi er nú ekið til Sorpurðunar Vesturlands í Fíflholti á Mýrum. Kostnaður hefur lækkað umtalsvert en samt sem áður þarf að hækka gjaldskrána enda var gjaldið allt of lágt sem innheimt var af málaflokknum í gegnum tíðina. Gjaldskráin er samt sem áður lægri eða svipuð og hjá öðrum sveitarfélögum.

09 Skipulags- og byggingamál

Nýr forstöðumaður Tæknideildar, Ármann Halldórsson, var ráðinn snemma á þessu ári.Starfar hann einnig fyrir Tálknafjarðarhrepp. Ármann hefur yfirumsjón með öllum verklegum framkvæmdum, skipulags-og byggingarmálum, umhverfismálum, viðhaldi og sorpmálum.

Bjarni Þór Einarsson lét af störfum sem byggingarfulltrúi á haustdögum og eru honum þökkuð vel unnin störf.
Fjárhagsáætlun gerir ráð fyrir kostnaðarlækkun við málaflokkinn um rúmar 6 milljónir. Hann mun fara úr tæpum 16 milljónum niður í tæpar11milljónir kr.

10 Umferðar- og samgöngumál

Viðhaldi gatna og gangstétta hefur verið haldið í algjöru lágmarki sl. ár. Mjög brýnt er að fara í viðhald á gatnakerfinu og er því gert ráð fyrir hækkun á útgjöldum til þessa málaflokks á árinu. Hér gildir einng eins og annars staðar: forgangsröðun.

Helstu verkefni:
1. Auka á framlög til viðhalds, malbikunar og afréttinga gatna bæði á Patreksfirði og Bíldudal.
2. Auka á framlög til gangstétta og göngustíga bæði á Patreksfirði og Bíldudal.

Heildarkostnaður við málaflokkinn er áætlaður 25 milljónir kr.

11 Umhverfismál

Lögð er fram almenn hagræðingarkrafa á málaflokkinn en jafnframt eru íbúar hvattir til þess að huga að umhverfi sínu og halda áfram því átaki sem hafið var á þessu ári í að bæta umhverfi sveitarfélagsins. Íbúar eru hvattir til að huga að görðum og húsum og sveitarfélagið mun áfram sömuleiðisleggja sitt af mörkum.

Ekki er gert ráð fyrir breytingum vegna grenjavinnslu nema breytingar verði á endurgreiðslum frá ríki.

Heildarkostnaður við málaflokkinn er 14 milljónir kr. og er það lækkun um tæpar 2 milljónir kr. frá 2011.

13 Atvinnumál

Framlög til atvinnumála hækka um 1 milljón kr. frá árinu 2011. og er heildarkostnaður við málaflokkinn áætlaður 8 milljónir kr.Áfram verðurstutt við ATVEST og fjármagn sett til verkefna til að sporna við atvinnuleysi. Þau verkefni verða unnin í samráði við Vinnumálastofnun. Áfram verðurgreitt til Markaðsstofu Vestfjarða. Haldið verður áfram að vinna við tjaldsvæðin á Bíldudal og Patreksfirði enda tekjuaukandi verkefni og mikilvægur þáttur í móttöku ferðamanna.

Kláraður verður 2. áfangi tjaldsvæðisins á Patreksfirði og haldið áfram við að græða upp svæði við tjaldsvæðið á Bíldudal.

17 Félagsheimili

Mikil þörf er á að taka umræðu um starfsemi, eignarhald, fjárhagslega ábyrgð og verkefni félagsheimila í sveitarfélaginu. Það er óforsvaranlegt að sveitarfélagið eitt beri ábyrgð á rekstri félagsheimila í sveitarfélaginu.
Þá er mikilvægt að kanna rekstrargrundvöll félagsheimilanna í sveitarfélaginu enda nauðsynlegt að fá tekjur inn til þess að hægt verði að fara í viðhaldsverkefni sem löngu er kominn tími á.

21 Sameiginlegur kostnaður

Sameiginlegur kostnaður lækkaði um 20 milljónir milli ársins 2010 og 2011 en árið 2010 var kosningaár og þá er kostnaður venjulega meiri. Áfram er gert ráð fyrir að sameiginlegur kostnaður lækki. Samþykkt hefur verið að sameina tvær nefndir með Tálknafjarðarhreppi og mikið aðhald hefur verið á bæjarskrifstofum. Rétt er að kanna hvort sameina megi fleiri nefndir.
Heildarkostnaður er áætlaður 74 milljónirkr. sem er lækkun um hálfa milljón kr. frá líðandiári.

31 Eignasjóður

Gert er ráð fyrir að afkoma eignasjóðs verði rúmlega 10 milljónir kr. betri árið 2012 frá endurskoðun fjárhagsáætlunar 2011 eða jákvæð um tæpar 27 milljónir kr. Reynt verður að halda við eignum sveitarfélagsins af fremsta megni.Viðamikil úttekt var gerð á orkunotkun af Verkfræðistofunni Afli og orku og tillögur gerðar til að lækka orkukostnað, en sveitarfélagið er að greiða 34 milljónir kr. á ári í orkukostnað. Gera þarf breytingar á hitastýringakerfi almennt til að lækka kostnað og munu íbúar geta tekið þátt í útboðum og verðum sem í boði verða fyrir sveitarfélagið.Unnið hefur verið að forgangsröðun verkefna en viðamestu verkefnin eru þó án efa:

• Bíldudalsskóli: Viðgerðir utanhúss.
• Patreksskóli: Þakviðgerðir og málning á gluggum.
• Birkimelsskóli: Viðgerðir á gluggum.
  
• Klára körfuboltavöll við Patreksskóla.
  
• Breytingar á hitastýringu í eignum sveitarfélagsins.

Gert er ráð fyrir eignasölu; íbúðir og annað húsnæði. Ágóði af eignasölu verður nýttur til að greiða upp skuldir.

Selja á:
1. Aðalstræti 63, Patreksfirði, bæjarskrifstofur
2. Jarðhæð í Urðargötu 23, Patreksfirði.
3. Allar íbúðir FV eru til sölu.
4. Stekkar 21, Patreksfirði.

Kaupa eða leigja á:
Nýtt húsnæði fyrir bæjarskrifstofur.

41 Hafnarsjóður

Heildartekjur Hafnarsjóðs eru áætlaðar tæpar 68milljónir kr. en gjöldin eru áætluð 65 milljónir kr. Tekjuáætlun hafnarsjóðs er varlega áætluð en gert er ráð fyrir tekjuaukningu vegna aukinna umsvifa hjá Ískalk og Fjarðalaxi.Nokkur tekjusamdrátturhefur orðið vegna framkvæmda við Patrekshöfn, sem átti að ljúka á þessu ári, en lýkur ekki fyrr en á vormánuðum úr því sem komið er. Á síðasta ári var lokið við deiliskipulag á hafnarsvæðinu á Patreksfirði, unnið að viðhaldi, lokið við fyrsta áfanga uppsáturs- og geymslusvæðis, farið í umhverfisátak á höfnunum, hafnarvog á Patreksfirði máluð, ljóshús á Brjánslæk máluð og ýmislegt fleira. Gjaldskrár munu hækka um 5%.

Framkvæmdir á vegum hafnarsjóðs:

• Lokið verði við framkvæmdir við lagnir og þekju í Patrekshöfn.
• Skoðun á heildarlausn flotbryggjuvanda í Vesturbyggð.
• Farið verður í málningarvinnu, viðhald og önnur umhverfisverkefni á hafnarsvæði.
• Uppsáturssvæði klárað á Patreksfirði.
• Áfram haldið áfram við viðhald Verbúðar á Patreksfirði.
• Öryggismál bætt á öllum höfnum.

43 Vatnsveita

Miklar framkvæmdir hafa verið við Vatsnveitu Vesturbyggðar á síðasta ári. Forstöðumaður tæknideildar vinnur nú að því að teikna upp lagnakerfi bæjarins enda hafa þær upplýsingar verið í ólestri í mörg ár og lega lagna aðeins verið í minni fyrrum eldri starfsmanna Vesturbyggðar. Feykileg viðhaldsþörf er komin á kerfið enda hefur því lítið verið sinnt í gegnum tíðina og kominn er tími á að endurnýja nánast allt kerfið. Til þess að hægt sé að mæta þessum auknu verkefnum er vatnsgjald hækkað. Tekjur eru áætlaðar um 20 milljónir en gert er ráð fyrir framkvæmdum fyrir nánast sömu upphæð. Endurnýjaðar verða aðveituæðar á Patreksfirði og Bíldudal. Heildargjöld málaflokksins nettó eru áætluð 674 þúsund kr. í fjárhagsáætlun ársins.
Unnið hefur verið að stofnun HitaveituVesturbyggðar svo hægt verði að selja orku úr borholu við Birkimel, sem er nú gjaldfrjáls. Vegna skrifræðis og aukinna krafna hins opinbera hefur enn ekki verið hægt að koma af stað starfsemi hitaveitunnar en stefnt er að því að ljúka því eins fljótt og auðið er. Verkefni Hitaveitu Vesturbyggðar verður ennfremur jarðhitaleit eða skoðun á varmadæluvæðingu í nánustu framtíð enda verður sveitarfélagið að leita allra leiða til að lækka húshitunarkostnað og rafmagnskostnað eins og áður hefur verið nefnt og þar með að auka lífsgæði íbúanna.

49 Fráveita

Nokkur aukning verður á útgjöldum til fráveitna vegna mjög aðkallandi verkefna sem liggja fyrir. Jafnframt voru fráveitugjöld hækkuð.Unnið verður að viðhaldi á fráveitukerfum sem eru eins og flest allt, komið á mikið viðhaldsstig. Gert er ráð fyrir að rekstur fráveitu verði á núlli.

57 Fasteignir Vesturbyggðar

Enn er gert ráð fyrir afleitri afkomu Fasteigna Vesturbyggðar ehf.Er gert ráð fyrir tæplega 4 milljón kr. tapi og rétt er að taka fram að A-sjóður mun leggja félaginu til 10 milljónir kr. Skýrist afkoma félagsins einungis af skuldavanda félagsins. Eins og áður hefur verið nefnt hafa viðræður staðið yfir við Íbúðalánasjóð í rúmt ár vegna þeirra lána sem hvíla á félaginu. Ekkert hefur gengið enda er úrræðaleysi sjóðsins gagnvart sveitarfélögum algjört og stefnuleysið líka. Reynt hefur verið að sinna lágmarksviðhaldið til þess að fá íbúa í íbúðir félagsins en fjármagnið er samt sem áður lítið sem ekkert.

Seldar hafa verið 5 íbúðir á árinu sem er jákvætt. Hins vegar hefur ekkert gengið í samskiptum við Íbúðalánasjóð varðandi afléttingu veða svo hægt sé að ganga frá sölu þessara íbúða. Varasjóður Húsnæðismála mun leggja til 50% af greiðslu þeirra lána sem eftir standa eftir kaupin en Fasteignir Vesturbyggðar hafa óskað eftir því að hin 50% verði hægt að flytja yfir á aðrar veðbandalausar eignir í eigu FV. Reynt verður að selja fleiri íbúðir, óíbúðarhæfar eignir lagaðar og þeim komið í leigu.

Nýtum tækifærin og sækjum fram

Stjórnendur bæjarfélags hafa mikil áhrif á framtíð sveitarfélaga. Miklivægt er að horfast í augu við þær staðreyndir sem við blasa og taka tillit til þeirra við mótun framtíðarstefnu. Raunsæi við áætlanagerð er lykilatriði. Bæjarfélag sem er sjálfbært og getur staðið á eigin fótum er betur í stakk búið til að takast á við breytta tíma og breyttar kröfur samfélagsins. Vesturbyggðar bíður að verða sjálfbært samfélag í fjárhagslegu tilliti. Það mun gerast á næstu árum ef rétt verður á málum haldið.

Fjárhagsáætlunin ber merki um ábyrga fjármálastjórn og mikinn viðsnúning frá fyrra ári. Ef dregnar eru saman þær aðgerðir sem bæjarstjórn hyggst grípa til og áhrif þeirra á rekstur sveitarfélagsins skoðuðþá mun sveitarfélaginu takast að vinna sig út úr þeim vanda sem að steðjar á næstu árum. Það er ljóst að það krefst sameiginlegs átaks íbúa, starfsmanna og stjórnenda sveitarfélagsins. Það er líka ljóst að vandinn er alls ekki óviðráðanlegur og Vesturbyggð mun ná vopnum sínum á ný. Auknar tekjur gefa tilefni til bjartsýni og örlítilli fjölgun íbúa ber að fagna.

Auknar álögur á íbúana eruekki vinsælar, en það ber þó að hafa í huga að þeir fjármunir sem sveitarfélög innheimta fara jú sannarlega til íbúa viðkomandi sveitarfélags aftur í formi þjónustu eða fjárfestingaenda er sveitarfélagið í sameign okkar allra. Nauðsynlegt er að viðhalda eignum sveitarfélagsins.Viðhaldsleysi síðustu áratuga er nú rækilega að koma fram og mikilvægt verður að leggja aukið fjármagn til viðhalds og fyrirbyggjandi aðgerða.

Fyrir liggur að taprekstur á árinu 2012 verður talsverður eða um 9 milljónir. Það er þóveruleglækkun, eða 40 milljónir, frá endurskoðaðri fjárhagsáætlun ársins 2011 sé litið framhjá óreglulegum tekjum vegna endurútreiknings ólöglegs erlends myntkörfuláns.Brýnasta verkefnið verður þó að lækka fjármagnsgjöld og afborganir lána. Hin þunga lánabyrði er sveitarfélaginu nánast um megn og lækkun á þessum gjöldum er lífsspursmál fyrir sveitarfélagið.Í þriggja ára áætlun verður lagður grunnur að viðsnúningi rekstrarins næstu ár í samvinnu við ráðgjafa frá Eftirlitsnefnd um fjármál sveitarfélaga.Sá viðsnúningur leggur grunnin að því að sveitarfélagið verði sjálfbært og öflugt og þar með vel ístakk búið til að þjóna þörfum íbúana. Forsenda þess að ná fram þeim skuldalækkunum sem stefnt erað, er einmitt að sýna fram á að sveitarfélagið geti verið sjálfbært. Rétt er að hafa það í huga þegar heildarmyndin erskoðuð að til mikils er að vinna, þrátt fyrir gjaldskrárhækkanir og aðhalds í rekstri.Sérstaklega í ljósi nýrra sveitarstjórnarlaga og fjármálareglna sveitarfélaga en í þeim felst að sveitarfélög mega ekki vera með taprekstur 3 ár í röð. Ég er líka sannfærð um að tekjur muni aukast almennt í samfélaginu sem leiðir til öflugra sveitarfélags þegar fram líða stundir.

Samvinna Vesturbyggðar og Tálknfjarðarhrepps verður æ mikilvægari fyrir bæði sveitarfélögin. Samvinna eykur hagkvæmni í rekstri beggja sveitarfélaga og bætir þjónustu við íbúana.

Lokaorð

Bæjarstjórnin ber ábyrgð á fjárhagslegum rekstri Vesturbyggðar og ætlar sér samhent að mæta erfiðri stöðu sveitarfélagsins. Þetta er mjög mikilvægt. Það er mín trú að ef við getum greitt niður lán sveitarfélagsins þá getum við litið bjartsýn fram á veginn.Atvinnulífið er blómlegt. Sjávarútvegurinn er sterkur og verður ávallt undirstöðuatvinnugrein Vesturbyggðar. Í laxeldi eru mikil sóknarfæri og við vonum að öll þau áform sem nú eru uppi heppnist vel og reynist sem vítamínssprauta í samfélögin okkar hér á svæðinu. Kalkþörungavinnslan á Bíldudal hefur verið mikill happafengur. Verksmiðjan vinnur nú að stækkun og vonandi verður flutt meira út en áður og að frekar verði unnið að nýtingu afurðarinnar í heimabyggð.Ferðaþjónusta er vaxandi þáttur í atvinnulífinu. Mikil sóknarfæri felast í stofnun þjóðgarðs á Látrabjargi og umhverfisvottun Vestfjarða. Síaukinn áhugi landsmanna og erlendra ferðamanna á Vestfjörðum er líka sóknarfæri fyrir okkur. Umhverfisvæn ferðaþjónusta og fjölskylduferðamennska eiga að vera okkar helsta vara. Í því sambandi þarf að líta til framtíðar og byggja upp grunnstoðir eða „hafnarmannvirki" ferðaþjónustunnar. Bættar samgöngur eru lykilatriði. Upplýsingamiðstöð er verkefni sem við eigum að setja á dagskrá á næstu árum samhliða því að hvetja til endurbygginga á gömlum húsum. Þá er það mín trú að þjóðgarður hér á svæðinu þar sem náttúruvernd, mannlíf og atvinnulíf vinna saman muni auka hagvöxt svæðisins umtalsvert.

En umfram allt þá býr hér hæfileikaríkt og gott fólk með einstakt lundarfar. Fólk sem þekkir að búa við einangrun, vondar samgöngur og erfiðar aðstæðurí okkar litla landi norður í höfum. Svoleiðis fólk getur rifið sig úr kreppu. Við fögnum líka unga fólkinu sem hingað er að flytja eftir nám og vill byggja upp framtíð sína hér . Það segir okkur að framtíð sunnanverðra Vestfjarða er björt.

Kæru íbúar!

Næstu ár verða áfram erfið en umsvifin í samfélaginu eru að aukast, við sjáum ný tækifæri verða að veruleika og það er íbúafjölgun. Trúin á sunnanverðum Vestfjörðum er að aukast og við þurfum sjálf að auka trú okkar á svæðinu með jákvæðni og uppbyggilegri gagnrýni. Við þurfum að vera sendiherrar svæðisins okkar, sýna aukinn metnað og vera stolt af því sem við höfum. Þannig mun Vesturbyggð verða sterkt samfélag á ný.

Patreksfirði, 14. desember 2011
Ásthildur Sturludóttir, bæjarstjóri

Önnur verkefni sem eru í undirbúningi og verða framkvæmd á næstu misserum.

1. Framkvæmdir við Gilsbakkagil á Bíldudal til varnar ofanflóðum og vatnselg eru í vinnslu.
2. Lyfta við Kamb er í undirbúningi.
3. Körfuboltaaðstaða við Bíldudalsskóla.
4. Lagfæringar á sparkvelli við Grunnskólann á Patreksfirði.
5. Smáviðhald á raðhúsum við Sigtún, Patreksfirði.
6. Bundið slitlag á Bala, Patreksfirði
7. Sorpflokkunarhús á Bíldudal og Patreksfirði.

Þá hefur fasteignamarkaðurinn verið heldur líflegur og nokkur sala hefur verið.

1. Aðalstræti 50 selt
2. Sigtún 47 selt
3. Sigtún 45 selt
4. Sigtún 43 selt
5. Balar 6, jarðhæð seld
6. Balar 4, jarðhæð seld
7. Skíðaskálinn á Mikladal
8. Skólastjórabústaðurinn á Krossholtum. Tilboð bíður samþykktar.

Ennfremur eru til sölu:

• Stekkar 13, efri hæð
• Allar aðrar íbúðir í eigu Vesturbyggðar

Þess má geta að nýr starfsmaður Umhverfisstofnunar, Hákon Ásgeirsson, er kominn til starfa fyrir Látrabjargsstofu. Hann mun hafa aðsetur hjá starfsmönnum Vesturbyggðar.

Framkvæmdir við Patreksfjarðarhöfn ganga vel en eru þó eitthvað á eftir áætlun vegna óhagstæðra veðurskilyrði í fyrravetur. Við vonumst til þess að framkvæmdum ljúki þó á haustdögum.

Ég minni ykkur á að hafa samband ef eitthvað er, asthildur@vesturbyggd.is og 864-2261.

Það er ótrúlegt að sjá allan þann fjölda sem hér er saman kominn í dag. 600 manns það segir sína sögu. Góð kona sagði mér eitt sinn að eldskírn stjórnmálamannsins fælist í að taka þátt í fundi um samgöngumál á Patreksfirði. Ögmundur fær því sína eldskírn hér í dag.

Fjöldinn sem hér er endurspeglar mikilvægi samgöngumála hér á þessu svæði. Samgönguleysið hér er dauðans alvara.

Ég vil þakka ráðherra þá viðleitni að reyna að sætta sjónarmið og vinna tillögu sem ætti að koma öllum til góða.

EN. Það er alltaf þetta stóra EN. Vonbrigðin eru mikil. Sumir ganga svo langt að segja að hér ríki sorg meðal íbúa vegna tillögu ráðherra á samgönguáætlun.

Leið D er ekki það sem við við viljum.

Hálsaleið-hálendisleið. Leið sem íbúar hafa ítrekað hafnað. Göng með tilheyrandi bið. Tveggja hæða vegur á endanum. Hvaða rugl er þetta þegar ríkissjóður glímir við fjárhagsvanda?

Samfélagið þolir þetta ekki mikið lengur.

• 30% íbúafækkun sl. áratugi.
• Brostnar forsendur í rekstri sveitarfélagsins.
• Eignaupptaka vegna lágsfasteignaverðs frá fólki sem í góðri trú reisti hér hús á 8. Á 9. Áratugnum.
• Lágt menntunarstig.
• Og síðast en ekki síst skert samkeppnishæfni fyrirtækja á svæðinu.
  

Ögmundur!

Menn skilja viðleitni þína en tillagan er ekki nóg. Göng munu bíða, allt er gert til að drepa málinu á dreif.

Ákvörðun um láglendisleið er val og þú átt það val og ákvörðunin er síðan Alþingis.

Ögmundur!

Hlustaðu á fólkið.

Ekki láta hagsmuni fárra ráða framtíð þessa svæðis

Ég skora á þig og þingmenn kjördæmisins að standa með vilja fólksins þegar kemur að leiðarvali í Gufudalssveit.

Þeir eigendur gáma eru vinsamlega beðnir að sækja um stöðuleyfi fyrir þeim til tæknideildar.

Átakið á hafnarsvæðinu á Patreksfirði miðast við að öll kör sem ekki eru í daglegri notkun fari á geymslusvæði. Eigendur karanna eru vinsamlega beðnir að hafa samband við tæknideild.

Til stendur að veita verðlaun fyrir fallegustu garða sveitarfélagsins og fallegasta umhverfi fyrirtækja í lok sumars.

Sameinumst í verki og tökum til!

Allar nánari upplýsingar veita forstöðumaður tæknideildar, verkstjórar þjónustumiðstöðva, hafnarverðir og bæjarstjóri.

Sú nýjung er innleidd í ár að greiðsluseðlar eru ekki sendir út heldur birtast þeir í heimabanka viðkomandi gjaldenda. Þetta er gert til að draga úr notkun pappírs, flýta útsendingu greiðslutilkynningar og lækka kostnað við innheimtu álagðra gjalda.

Þeir sem óska eftir að fá útprentaða greiðsluseðla eru vinsamlegast beðnir um að snúa sér til bæjarskrifstofu Vesturbyggðar, s. 450 2300.

Alls er lagt á 1.643 eignir og eignahluta, sem eru að mannvirkjamati 4.008 millj.kr. og 362 millj.kr. að lóðarhlutamati eða 4.370 millj.kr. að fasteignamati. Álögð gjöld, sem eru fasteignaskattur, lóðarleiga, vatnsgjald, fráveitugjald og umhverfisgjöld, eru samtals 94,6 millj.kr.

Gjalddagar fasteignagjalda eru átta og er fyrsti gjalddagi 1. febrúar 2011.

Elli- og örorkulífeyrisþegar fá afslátt á fasteignaskatti og fráveitugjaldi, en afsláttur er tekjutengdur.

Nánar má lesa um álagningarreglur á heimasíðu sveitarfélagsins

Vesturbyggð, 28. janúar 2011,

Bæjarstjóri Vesturbyggðar

• Vesturbyggð - allar gjaldskrár fyrir 2011
  

1. Dagvistunargjöld verða ekki hækkuð.
2. Verð á hádegishressingu á leikskóla verður ekki hækkuð.
3. Styrkir til golfklúbba verða lækkaðir.
4. Framlag til Slökkvistöðvar á Bíldudal verður hækkað.
5. Kostnaður við jóla-og áramótaskraut verður lækkað um 900 þúsund.
6. Afsláttur verður gefinn til eldri borgara og tekjulágra á slætti og garðhirðu.

Áætlaður kostnaður við þessar breytingar eru 626.000 kr. Þetta þýðir auknar lántökur sem upphæðinni nemur.

Rétt er að taka fram að óvissuþættir eru um þróun útsvarstekna og framlags úr Jöfnunarsjóði sveitarfélaga. Þar er átt við að boðaðar breytingar á reglugerð Jöfnunarsjóðsins hafa ekki enn gengið eftir og því eru greiðslur frá Jöfnunarsjóði byggðar á spám. Mjög erfitt er að spá um þróun útsvarsteknanna vegna óvissu í sjávarútvegi; Þróun fiskverðs sem er beintengd launakjörum sjómanna annars vegar og þá miklu óvissu sem ríkir um stjórn fiskveiða hinsvegar og þá hvað þær mögulegu breytingar geti haft á útsvarstekjur sveitarfélaga, sérstaklega á landsbyggðinni.

Vesturbyggð, 15. desember 2010
Ásthildur Sturludóttir, bæjarstjóri

Íbúum var boðið að koma að fjárhagsáætlunargerðinni fyrir árið 2011 með því að taka þátt í þremur fundum sem haldnir voru í öllum byggðakjörnum. Á þá mættu ríflega 10% íbúa sveitarfélagsins. Fjölmargar góðar hugmyndir komu fram sem nýttar voru við frumvarpsvinnuna. Við fjárhagsáætlunargerðina var mikið tillit tekið til tillagna forstöðumanna um rekstur og önnur verkefni en ekki síst tillögur um hagræðingaraðgerðir. Áætlunin endurspeglar því bæði vilja forstöðumanna og íbúa Vesturbyggðar sem tóku þátt í íbúafundunum. Ég vil nota tækifærið og þakka þeim íbúum sem tóku þátt í vinnunni sérstaklega. Hún sýnir svo ekki er um villst að íbúar sýna bæði ábyrgð og áhuga á fjármálum sveitarfélagsins. Þá bera að þakka bæjarstjórn Vesturbyggðar fyrir þá miklu vinnu sem hún hefur lagt á sig við fjárhagsáætlunargerðina. Það er alls ekki algilt að sveitarstjórnir standi heilar á bak við fjárhagsáætlanir. En hér hafa bæjarfulltrúar sýnt þann þroska og ábyrgð að vinna að áætluninni saman.

Fjárhagur sveitarfélagsins er afar þungur. Það verður því óumflýjanlegt að gera miklar breytingar á rekstrinum til að ná fram hagræðingu og sparnaði. Jafnframt verður leitast við að skerða sem minnst þjónustu við íbúa. Ljóst er að ekki verður hægt að ná fram sparnaði af öllum verkefnum strax á næsta ári. Því er horft til nánustu framtíðar við hagræðingaraðgerðir. Þó verður að taka fram að sumar aðgerðir eru tímabundnar. Bæjarstjórn ber þá von í brjósti að sveitarfélagið muni rétta úr kútnum í náinni framtíð.

Talsverðar breytingar eru áætlaðar á verksviði starfsmanna til að nýta þann mannauð sem Vesturbyggð býr yfir, sem best. Þær breytingar verða unnar í samstarfi við starfsfólk á árinu.

Í dag eru skuldir sveitarfélagsins Vesturbyggðar um 1300 milljónir sem er of há fjárhæð. Tekjur hafa jafnframt farið minnkandi. Stafar það helst af fólksfækkun undangenginna ára og jafnvel áratuga sem þó snérist tímabundið við á síðasta ári en heldur áfram í ár sem er mikið áfall. Þá hefur sú óvissa sem ríkir í sjávarútvegi gríðarleg áhrif í Vesturbyggð og kemur beint fram í lækkandi tekjum sveitarfélagsins.

Tekjurýrnun sveitarfélagsins hefur ekki aðeins orðið vegna fækkunar íbúa og óvissu í sjávarútvegi. Hún hefur ekki síst orðið vegna einhliða ákvarðana ríkisvaldsins sem bitna á sveitarfélögunum. Minnkandi framlög úr Jöfnunarsjóði sem tilkynnt voru seint á árinu, auk þess að ríkisvaldið veltir verkefnum sínum yfir sveitarfélögin og litlar sem engar tekjur fylgja með. Það er óþolandi að þegar ríkið gerir kröfu til sveitarfélaga um fjárhagsáætlun til þriggja ára í senn, þá geti það sjálft ekki gert slíkt hið sama. Sveitarfélögin verða að mótmæla þessari framkomu kröftuglega.

Í fjárhagsáætluninni er gert ráð fyrir að unnið verði að skuldbreytingu lána og óhagkvæm lán endurfjármögnuð. Í dag eru stærstu lánadrottnar sveitarfélagsins annarsvegar Lánasjóður sveitarfélaga og hins vegar Íbúðalánasjóður vegna Fasteigna Vesturbyggðar. Viðræður eru hafnar við Íbúðalánasjóð um niðurfærslu skulda hjá Fasteignum Vesturbyggðar sem eru gríðarlega þungur baggi á sveitarfélaginu. Lánasjóður sveitarfélaga er tilbúinn til viðræðna um endurfjármögnun lána.

Aðrir stórir lánadrottnar eru Byggðastofnun og Landsbankinn. Er það vegna lána sem stofnað var til á 9. áratug síðustu aldar, fyrir sameiningu sveitarfélaga í Vesturbyggð og síðan til aukningar stofnfjárhlutar Vesturbyggðar í Sparisjóði Vestfirðinga (og síðar í Sparisjóði Keflavíkur). Sá hlutur er einskis virði í dag eftir fall SpKef en eftir standa skuldirnar. Meðal annars stórt og óhagkvæmt lán í erlendri mynt við Landsbanka Íslands. Standa nú yfir samningar vegna þeirra lána við nýja Landsbankann í samstarfi við Tálknafjarðarhrepp og Súðavíkurhrepp sem eru í svipaðri stöðu.

• Gert er ráð fyrir 3% hækkun verðlags á milli fjárhagsára.
  
• Gert er ráð fyrir óbreyttu meðalgengi á næsta ári frá nóvember 2010.
• Tap ársins er áætlað 45 milljónir.

Þrátt fyrir erfiða skuldastöðu er rétt að sýna bjartsýni og gera ráð fyrir að þessi staða sé einungis tímabundin. Munum að öll él styttir upp um síðir.

Aðgerðir til að rétta af stöðu bæjarsjóðs

Þær aðgerðir sem bæjarstjórn hyggst grípa til á yfirstandandi kjörtímabili í því skyni að rétta af stöðu bæjarsjóðs eru í fimm liðum:

1. Aðhald í rekstri og fjárhagsleg endurskipulagning
2. Tekjuaukning
3. Skipulagsbreytingar
4. Forgangsröðun verkefna
5. Niðurgreiðsla skulda

1. Aðhald í rekstri og fjárhagsleg endurskipulagning

Farið hefur verið í saumana á öllum rekstri sveitarfélagsins. Gætt verður hagkvæmni í öllum vöru og
þjónustukaupum og reynt að bjóða út verkefni eftir fremstu getu. Innkaupastefna sveitarfélagsins verður endurskoðuð og sú krafa sett að ávallt sé leitað hagstæðustu verða hverju sinni.

Launakostnaður verður skoðaður sérstaklega hjá öllum stofnunum og deildum og reynt af fremsta megni að minnka yfirvinnu og bæta nýtingu mannafla. Ekki er gert ráð fyrir launahækkunum í frumvarpinu þar sem kjarasamningar eru lausir og óvíst um niðurstöðu kjarasamningaviðræðna. Reynt verður að komast hjá því að ráða fólk í störf ef hægt er. Í sumum tilvikum verður dregið úr þjónustu sem ekki er lögbundin.

Samið verður um endurfjármögnun óhagkvæmra lána og kjör skammtímalána.

Sú krafa verður sett á forstöðumenn að gæta ítrasta aðhalds í rekstrinum. Sérstakt átak verður gert til að fylgjast með rekstrinum frá einum mánuði til þess næsta. Framúrkeyrsla úr fjárhagsáætlun er ekki ásættanleg.

2. Tekjuaukning

Nauðsynlegt mun reynast að hækka þjónustutekjur með því að leiðrétta gjaldskrár svo þær verði í samræmi við gjaldskrár annarra sveitarfélaga. Heilt yfir eru í flestum tilfellum 10% gjaldskrárhækkun nema í sorpmálum þar sem hækkunin nemur 20% milli ára. Ástæðan fyrir því verður skýrð út síðar.

Reynt verður af fremsta megni að laða íbúa og fyrirtæki til Vesturbyggðar til varanlegrar búsetu. Það gerum við öll með samstilltu átaki.

3. Skipulagsbreytingar

Á árinu 2011 er stefnt að viðamiklum skipulagsbreytingum á starfsemi sveitarfélagsins til að ná fram hagræðingu í rekstrinum, nýta mannauðinn sem best og ekki síst til að bæta þjónustu við íbúa. Unnið verður að breytingum á skipuriti Vesturbyggðar á næsta ári með þetta fyrir augum. Gerð verður starfsmannastefna fyrir Vesturbyggð.

Gerðar verða breytingar á verkaskiptingu á bæjarskrifstofum á næsta ári í samræmi við athugasemdir endurskoðenda sveitarfélagsins.

Nýtt skipurit

Skipuriti Vesturbyggðar verði breytt þannig að það leiði til markvissari stjórnunar og betri skilvirkni. Yfirstjórninni verður skipt upp í svið sem bera ábyrgð á tilteknum málaflokkum. Breytingar þessar verða innleiddar og útfærðar nánar í samstarfi við starfsmenn á næsta ári.

• Tæknisvið.
  Forstöðumaður tæknideildar tekur til starfa í upphafi árs og er það verkefni sem unnið verður í samstarfi við Tálknafjarðarhrepp. Tæknisvið mun hafa yfirumsjón með skipulags-og byggingarmálum, framkvæmdum, veitum, sorpmálum, brunavörnum, Höfnum Vesturbyggðar og umhverfismálum. Unnið er að lausn á sorpmálum í samstarfi við Tálknafjarðarhrepp.
• Fjármálasvið.
  Undir því tilheyra bókhald, reikningar, innheimta, launaútreikningar og gjaldkerastörf. Samstarf við Tálknafjarðarhrepp hefur ennfremur verið um launaútreikninga sem unnir hafa verið á skrifstofum Vesturbyggðar.
• Fræðslu-og félagsmálasvið.
  Málefni fatlaðra munu flytjast frá ríki yfir til sveitarfélaga nú um áramót og mun sá málaflokkur heyra undir félagsþjónustuna sem starfrækt verður í samstarfi við Tálknafjarðarhrepp. Gert er ráð fyrir að félagsþjónusta, menningarmál, æskulýðs-og íþróttamál og þjónusta við öll skólastig Vesturbyggðar muni heyra undir Fræðslu-og félagsmálasvið. Það er mjög slæmt að ekki sé starfsmaður innan yfirstjórnar sem er tengiliður og sinnir þessum stærsta málaflokki sveitarfélagsins, fræðslumálum.

Aðrar skipulagsbreytingar

Talsverðar breytingar eru áformaðar á skipulagi fræðslumála. Tónlistarskólinn verður færður í húsnæði Patreksskóla og húsnæði tónlistarskólans við Stekki 21 selt. Vegna fækkunar nemenda í Birkimelsskóla verður skólastarf þar endurskipulagt. Ekki stendur til að leggja skólann niður. Allt þetta er gert í hagræðingarskyni en ennfremur til að auka gæði skólastarfs.

4. Forgangsröðun verkefna

Við fjárhagsáætlunina er gert ráð fyrir að verkefnum verði forgangsraðað. Öll verkefnin eru mikilvæg en nauðsynlegt er að fara rækilega yfir einstök verkefni sem ekki geta beðið.

Fyrsta verkefni nýs forstöðumanns Tæknisviðs verður að gera heildstæða framkvæmdaáætlun vegna viðhalds og annarra verkefna á næstu árum. Horft verður til næstu 4 ára.

5. Niðurgreiðsla á skuldum

Gert er ráð fyrir að skuldir verði greiddar niður um 30 milljónir á árinu 2011. Það verður að teljast gott eins og fjárhagsstaðan er. Farið verður í skuldalækkun með sértækum aðgerðum og vaxtakjör leiðrétt. Unnið er að endurfjármögnun skulda í samráði við Lánasjóð sveitarfélaga . Lánstraust hjá Lánasjóði sveitarfélaga skiptir sveitarfélagið öllu máli enda býður sjóðurinn mun betri kjör en aðrar lánastofnanir.

Sveitarfélagið hefur nú þegar hafið viðræður við Íbúðalánasjóð um endurfjármögnun áhvílandi lána á íbúðum Fasteigna Vesturbyggðar. Eins eru viðræður hafnar vegna lána í Landsbanka Íslands sem tekin voru vegna stofnfjárbréfakaupa í SPFV og SpKEF.

Skatttekjur

Útsvar

Jöfnunarsjóður sveitarfélaga

Fasteignaskattur

• Einstaklingar með árstekjur allt að 2.021 þús kr.
• Hjón með árstekjur allt að 2.835 þús kr.

• Til einstaklinga með tekjur frá 2.041-3.606 þús kr.
• Til hjóna með tekjur frá 2.575 þús kr.-3.606 þús kr.

Útgjaldaliðir

02 Félagsþjónusta

Miklar breytingar eru áætlaðar á Félagsþjónustunni eins og áður hefur verið getið með yfirtöku á málefnum fatlaðra. Félagsþjónustan verður sameiginleg með Tálknafjarðarhreppi. Útgjöld til félagsþjónustu í Vesturbyggð hafa verið tiltölulega lítil á landsvísu. Aðstæður þurfa þó ekki mikið að breytast svo að útgjöld til málaflokksins verði í samræmi við önnur sveitarfélög. Gert er ráð fyrir að setja aukið fjármagn í átaksverkefni gegn atvinnuleysi. Enn fremur er verið að skoða hvernig megi útvíkka þjónustu við íbúa, óháð aldri og öðrum þáttum.

Ekki er gert ráð fyrir breytingum á félagsstarfi fyrir aldraða frá því sem nú er nema að nú þurfa notendur að greiða innritunargjald sem þó verður stillt mjög í hóf. Í skoðun eru breytingar sem þurfa lengri tíma í undirbúningi er varða aðstöðumál. Aðstaða sem íbúar Kambs hafa lengi barist fyrir, lyfta við húsið, verður sett upp á nýju ári. Boðað er að óbreyttar reglur gildi um kostnaðarþátttöku ríkisins í húsaleigubótum og þess vegna er gert ráð fyrir áfram verði greiddar húsaleigubætur samkvæmt núgildandi reglum.

03 Heilbrigðismál

Ekki er reiknað með sérstökum aðgerðum í þessum málaflokki.

04 Fræðslu- og uppeldismál

Fræðslu-og uppeldismál er útgjaldafrekasti málaflokkur allra sveitarfélaga og eru þau flest að skoða hvernig megi draga úr kostnaði en jafnframt að viðhalda gæðum þjónustunnar. Umræða um samrekstur og sameiginlega yfirstjórn skóla hefur verið mjög fyrirferðamikil í samfélaginu undanfarið. Það er nauðsynlegt að Vesturbyggð skoði þann möguleika til að hagræða í rekstrinum enda fræðslumál stærsti málaflokkurinn. Þó kann að vera að slík sameining skili ekki því sem ætlast er til. Aukinn stuðningur verður við málaflokkinn með því að færa þjónustu við hann undir Fræðslu-og félagsmálasvið. Bæjarstjórn leggur ríka áherslu á að styðja við bakið á fræðslumálum. Hagræðingar í rekstrinum og skipulagsbreytingar eru þáttur í að efla skólastarfið til lengri tíma. Öll skólastig Vesturbyggðar munu starfa undir formerkjum Uppbyggingarstefnunnar: Uppeldi til ábyrgðar.

Stefnt er að því að vinna Fjölskyldu-og skólastefnu fyrir Vesturbyggð á næstu 2 árum.

Vesturbyggð mun styðja við bakið á þeim starfsmönnum sem ætla sér að ná í kennararéttindi en sá stuðningur var felldur niður fyrir 2 árum. Þetta verður gert í samstarfi við skólastjórnendur þannig að viðbótarkostnaður skapist ekki og einnig verður sett takmörk um hámarksfjölda einstaklinga á ári hverju.

Grunnskóli Vesturbyggðar

Tónlistarskóli Vesturbyggðar

Leikskólar Vesturbyggðar

05 Menningarmál

Ekki er gert ráð fyrir miklum breytingum á rekstri bókasafnanna á Patreksfirði og Bíldudal. Gert er ráð fyrir 10% hækkun á gjaldskrá milli ára.

Rekstur Skjaldborgarbíós verður settur í fastar skorður enda bíóið mikilvægur þáttur í menningarlífi sveitarfélagsins. Lionsmenn og áhugasamir einstaklingar hafa sýnt bíóinu mikinn stuðning og velvilja sem ber að þakka.

Endurskoða á starfsemi Minjasafnsins á Hnjóti og fyrirkomulag starfseminnar í samstarfi við stjórn safnsins og Tálknafjarðarhrepp og verður framlag Vesturbyggðar lækkað úr 2800 þús kr. í 2500 þús. kr.

06 Æskulýðs- og íþróttamál

Gert er ráð fyrir að draga úr þjónustu í Bröttuhlíð. Lokað verður á sunnudögum yfir vetrartímann, frá 1. október til 1. maí, og lögð fram krafa um aðra hagræðingu upp á 2 milljónir. Leita á allra leiða til að lækka hitunar-og lýsingarkostnað í íþróttamiðstöðunum Bröttuhlíð og Byltu.

Þak verður sett á vinnuskólann yfir sumartímann og aðeins börn eldri en 15 ára fá vinnu. Er það gert svo hægt verði að mæta þörf hjá eldri börnum, allt að 18 ára aldri. Endurskoða má þessa ákvörðun ef minni ásókn eldri barna verður í vinnuskólann.
Ekki er gert ráð fyrir hærri framlögum en 4,6 milljónum í vinnuskólann og er það talsverð lækkun frá fyrra ári.

Ekki er gerð krafa um breytingu á opnunartíma félagsmiðstöðvarinnar Vest-end. Stutt verður fjárhagslega við starf félagsmiðstöðvar á Bíldudal. Lagt er til að íþróttafélögin fái sama stuðning og síðustu ár en framlög til golfklúbbanna á Bíldudal og Patreksfirði verður lækkað og samræmt við framlög til annarra íþróttafélaga.

07 Brunamál og almannavarnir

Brunavarnir á sunnanverðum Vestfjörðum voru til skamms tíma í miklum ólestri. Síðustu ár hefur mikið og gott starf verið unnið, m.a. í markvissu fyrirbyggjandi starfi. Hins vegar verður að taka málaflokkinn til endurskoðunar á árinu. Kostnaður Vesturbyggðar við málaflokkinn er mun hærri en hjá öðrum sveitarfélögum af sömu stærðargráðu. Samkvæmt tillögu til fjárhagsáætlunar verður kostnaðurinn þó enn yfir landsmeðaltali. Fjárhagsáætlun gerir ráð fyrir kostnaðarlækkun. Kostnaður mun lækka í 16 milljónir kr.

Setja verður þak á fjölda æfinga slökkviliða á svæðinu á árinu. Viðhaldi verður haldið í lágmarki, forgangsröðun og aðgerðaáætlun fyrir næstu ár unnin miðað við breyttar forsendur. Þar sem verkefnum við uppbyggingu markviss eldvarnareftirlits er að mestu lokið verða slökkviliðsstjóra falin ýmis önnur verkefni.

Ofanflóðavörum á Bíldudal er lokið en haldið verður áfram við hönnun snjóflóðavarnargarða á Patreksfirði. Ofanflóðasjóður kostar 90% af þeim kostnaði.

08 Hreinlætismál

Kostnaður við sorphirðingu og sorpförgun hefur farið vaxandi á undanförnum árum og er málaflokkurinn allt of dýr miðað við umfang. Vesturbyggð hefur í áraraðir greitt með þjónustunni sem er óeðlilegt, ef ekki ólöglegt. Unnið er að endurskoðun á fyrirkomulagi sorpmála í Vesturbyggð og Tálknafjarðarhreppi með það að markmiði að lækka kostnað, auka flokkun, rétta af kostnaðarskiptingu og minnka flutningskostnað sorps frá Vesturbyggð. Gert er ráð fyrir að sú vinna klárist fyrir áramót. Stefnt er að lækkun útgjalda til málaflokksins og sorpgjöld verða hækkuð um 20%. Þrátt fyrir þessar aðgerðir þarf enn að greiða með málaflokknum.

09 Skipulags- og byggingamál

Nýr forstöðumaður Tæknisviðs verður ráðinn á næstu dögum og mun hann eins og áður hefur verið nefnt hafa yfirumsjón með öllum verklegum framkvæmdum, skipulags-og byggingarmálum, umhverfismálum, sorpmálum, Fasteignum Vesturbyggðar ofl. Með því að ráða tæknimann til sveitarfélagsins er áætlað að kostnaður við málaflokkinn muni lækka umtalsvert til lengri tíma litið og að þjónustan verði mun betri en hún er í dag.

Fjárhagsáætlun gerir ráð fyrir kostnaðarlækkun við málaflokkinn um tæpar 3 milljónir. Hann mun fara úr rúmum 15 milljónum niður í rúmar 12 milljónir.

Mikil þörf er á að gerðar verði viðhaldsáætlanir og aðgerðaáætlanir fyrir sveitarfélagið.

10 Umferðar- og samgöngumál

Viðhaldi gatna og gangstétta hefur verið haldið í algjöru lágmarki sl. ár. Mjög brýnt er að fara í viðhald á gatnakerfi og er því gert ráð fyrir hækkun á útgjöldum til þessa málaflokks á árinu . Kostnaðurinn mun fara úr tæpum 14 milljónum í rúmar 17 milljónir. Hér gildir einng eins og annars staðar: forgangsröðun.

Helstu verkefni:

1. Endurnýja á brú og setja ræsi í Aðalstræti við Stekkagil.

3. Auka á framlög til gangstétta og göngustíga bæði á Patreksfirði og Bíldudal.

11 Umhverfismál

Lögð er fram almenn hagræðingarkrafa á málaflokkinn en jafnframt eru íbúar hvattir til þess að huga að umhverfi sínu og að fara ásamt sveitarfélaginu í allsherjar umhverfisátak til að bæta ásýnd þess. Íbúar eru hvattir til að huga að görðum og húsum og sveitarfélagið mun leggja sitt af mörkum.

Kostnaður við refaeyðingu verður ekki greiddur vegna niðurfellingar á framlagi ríkisins til málaflokksins. Áfram verður greitt fyrir eyðingu minka. Bæjarstjórn vill að skoðaðar verði nýjar leiðir til að nýta refaveiðar í ferðaþjónustu.

Kostnaðurinn við málaflokkinn mun aukast lítillega, fer úr 12 milljónum í 12,3 milljónir.

13 Atvinnumál

Framlög til atvinnumála munu lækka um 1 milljón skv. fjárhagsáætluninni. Áfram er stutt við ATVEST og sett er aukið fjármagn til verkefna til að sporna við atvinnuleysi. Þau verkefni verða unnin í samráði við Vinnumálastofnun. Áfram er greitt til Markaðsstofu Vestfjarða. Haldið verður áfram að vinna við tjaldsvæði á Bíldudal og Patreksfirði enda tekjuaukandi verkefni og mikilvægur þáttur í móttöku ferðamanna. Skoða á útboð á rekstri tjaldsvæða. Áhersla verður á að klára vinnu við tjaldsvæðið á Patreksfirði og koma upp aðstöðu við tjaldsvæðið á Bíldudal.

17 Félagsheimili

Mikil þörf er á að taka umræðu um starfsemi, eignarhald, fjárhagslega ábyrgð og verkefni félagsheimila í sveitarfélaginu. Það er óforsvaranlegt að sveitarfélagið eitt beri ábyrgð á rekstri félagsheimila sveitarfélagsins. Viðræður munu eiga sér stað við eigendafélag FHP um framtíðar fyrirkomulag félagsheimilisins á Patreksfirði.

21 Sameiginlegur kostnaður

Samkvæmt fjárhagsáætlun er gert ráð fyrir að lækka kostnað um 17 milljónir.

Bæjarráð mun fækka fundum sínum um helming. Nefndir verða sameinaðar og fundahaldi stillt í hóf. Með þessum aðgerðum má lækka kostnað verulega. Taka verður fram að kostnaður á kosningaári er ávallt meiri en á „venjulegu" ári.

Kostnaður verður lækkaður um 15,3 milljónir á skrifstofum Vesturbyggðar frá niðurstöðu ársins 2010.

31 Eignasjóður

Gert er ráð fyrir að afkoma eignasjóðs verði rúmlega 3,5 milljónir kr. betri á næsta ári frá endurskoðun fjárhagsáætlunar 2010. Reynt verður að halda við eignum sveitarfélagsins af fremsta megni. Farið verður í forgangsröðun á viðhaldi sem mun nást á næstu 3 árum. Viðamestu verkefnin verða þó án efa:

• Bíldudalsskóli: Innan-og utanhúss
• Patreksskóli: Innan-og utanhúss
• Birkimelsskóli: Innan-og utanhúss.
• Gerð verði úttekt á hita og rafmagnsnotkun og leitað leiða til að lækka húshitunar og rafmagnskostnað.

Gert er ráð fyrir eignasölu; íbúðir og annað húsnæði. Ágóði af eignasölu verður nýttur til að greiða upp skuldir.

Selja á:
1. Jarðhæð í Urðargötu 23, Patreksfirði.
2. Allar íbúðir FV eru til sölu.
3. Mikladalsveg 5 á Patreksfirði.
4. Uppkaupshús við Lönguhlíð á Bíldudal.
5. Skólastjórabústað á Birkimel.
6. Tónlistarskóli, Stekkum 21

41 Hafnarsjóður

Heildartekjur Hafnarsjóðs eru áætlaðar 52,3 milljónir kr. en gjöldin eru áætluð 55,3 milljónir. Tekjuáætlun hafnarsjóðs er mjög varlega áætluð enda hefur verið talsverður tekjusamdráttur vegna styrkingar krónunnar, gæftaleysis en ekki síst vegna óvissu í sjávarútvegi og óvirks leigumarkaðar með kvóta.

Ennfremur er ekki síst tekjusamdráttur vegna mikilla framkvæmda við Patrekshöfn.

Framkvæmdir

• Lokið verði við framkvæmdir við Patrekshöfn. Steypt verður þekja við viðlegukantinn.
• Deiliskipulag hafnarsvæðis á Patreksfirði verður klárað.
• Farið verður í málningarvinnu, viðhald og önnur umhverfisverkefni á hafnarsvæði.
• Skipulagt verður uppsátur og geymslusvæði fyrir báta á hafnarsvæðum.
• Viðhald á Verbúð á Patreksfirði. Unnin verður aðgerðaáætlun sem miðar við áfangaskiptingu verksins. Skipt verður um glugga á neðri hæð og lyftaraaðgengi bætt við húsið í fyrsta áfanga.
• Viðhald og umhverfisverkefni við höfnina á Brjánslæk.
• Umhverfisverkefni og skipulag geymslusvæðis á Bíldudal.

43 Vatnsveita

Stofnuð verður Hitaveita Vesturbyggðar og orka seld úr borholu við Birkimel sem er nú gjaldfrjáls. Þannig verði gætt jafnræðis meðal íbúa. Verkefni Hitaveitu Vesturbyggðar verður ennfremur jarðhitaleit í nánustu framtíð enda verður sveitarfélagið að leita allra leiða til að lækka húshitunarkostnað og rafmagnskostnað.

Byggingarfulltrúa verður falið að uppfæra teikningar á lagnakerfi innan þéttbýlis.

49 Fráveita

Nokkur aukning verður á útgjöldum til fráveitna vegna mjög aðkallandi verkefna sem liggja fyrir.

57 Fasteignir Vesturbyggðar

Gert er ráð fyrir nokkuð betri afkomu en í fyrra. Eins og áður hefur verið nefnt eru viðræður nú þegar hafnar við Íbúðalánasjóð um þau lán sem áhvílandi eru á félaginu. Lítið andrými mun verða fyrir viðhald nema að setja upp lyftu við Kamb en það verður stærsta verkefni ársins.

Stjórnendur bæjarfélags geta haft mikil áhrif á framtíð síns byggðarlags. Miklivægt er að horfast í augu við þær staðreyndir sem við blasa og taka tillit til þeirra við mótun framtíðarstefnu. Bæjarfélag sem er sjálfbært og getur staðið á eigin fótum er betur í stakk búið til að takast á við breytta tíma og breyttar kröfur samfélagsins.

Vörn snúið í sókn

Ef dregnar eru saman þær aðgerðir sem bæjarstjórn hyggst grípa til og áhrif þeirra á rekstur sveitarfélagsins skoðuð þá mun sveitarfélaginu takast að vinna sig út úr þeim vanda sem að steðjar á næstu árum. Það er ljóst að það krefst sameiginlegs átaks íbúa, starfsmanna og stjórnenda sveitarfélagsins. Það er líka ljóst að vandinn er alls ekki óviðráðanlegur og Vesturbyggð mun ná vopnum sínum á ný.

Auknar álögur á íbúana geta ekki orðið vinsælar, en það ber þó að hafa í huga að þeir fjármunir sem sveitarfélög innheimta fara jú sannarlega til íbúa viðkomandi sveitarfélags aftur í formi þjónustu eða fjárfestinga. Fyrir liggur að taprekstur á árinu 2011 verður talsverður eða 45 milljónir. Það er þó lækkun frá endurskoðaðri fjárhagsáætlun ársins 2010.

Brýnasta verkefnið verður þó að lækka fjármagnsgjöld og afborganir lána. Hin þunga lánabyrði er sveitarfélaginu nánast um megn og því lífsspursmál fyrir sveitarfélagið.

Í þriggja ára áætlun verður lagður grunnur að viðsnúningi í rekstri næstu ára. Sá viðsnúningur leggur grunnin að því að sveitarfélagið verði sjálfbært og öflugt og þar með vel í stakk búið til að þjóna þörfum íbúanna. Forsenda þess að ná fram þeim skuldalækkunum sem stefnt er að, er einmitt að sýna fram á að sveitarfélagið geti verið sjálfbært. Rétt er að fólk hafi það í huga þegar heildarmyndin er skoðuð að til nokkurs er að vinna, þrátt fyrir gjaldskrárhækkanir og aðhald í rekstri. Þá verður samvinna við Tálknfirðinga æ mikilvægari fyrir bæði sveitarfélögin. Samvinna eykur hagkvæmni í rekstri beggja sveitarfélaga og bætir þjónustu við íbúana.

Framtíðarsýn

Segja má að nú í ár sé upphaf nýrra tíma hér í Vesturbyggð. Ný bæjarstjórn tekin við sem leggur alla áherslu á að vinna saman að verkefnum sínum. Bæjarstjórnin ber saman ábyrgð á fjárhagslegum rekstri sveitarfélagsins og ætlar sér, samhent að mæta erfiðri stöðu sveitarfélagsins. Þetta er mjög mikilvægt.

Það er mín trú að ef við getum greitt niður lán sveitarfélagsins þá getum við litið bjartsýn fram á veginn.

Atvinnulífið er blómlegt. Sjávarútvegurinn er sterkur og verður ávallt undirstöðuatvinnugrein Vesturbyggðar. Við stefnum að því að eiga glæsilegustu fiskihöfn landsins hér á Patreksfirði og hafnarstjórn er farin að kanna möguleika á að fara í ferli til að fá Bláfánavottun á höfnina og þar með verður aukin áhersla á umhverfismál við hafnirnar en það er í takt við nýja tíma.

Framtíðarsýnin á auðvitað að vera sú að allar hafnir okkar hafi slíka vottun. Ennfremur er það vilji hafnarstjórnar að ýta undir frekari iðnað og þjónustu við útgerð og fiskvinnslu .

Kalkþörungavinnslan á Bíldudal hefur verið mikill happafengur. Vonandi mun verksmiðjan stækka og að frekar verði unnið að nýtingu afurðarinnar í heimabyggð.

Ferðaþjónusta er vaxandi þáttur í atvinnulífinu. Síaukinn áhugi landsmanna og erlendra ferðamanna á Vestfjörðum er sóknarfæri fyrir okkur. Umhverfisvæn ferðaþjónusta og fjölskylduferðamennska eiga að vera okkar helsta vara. Í því sambandi þarf að líta til framtíðar og byggja upp grunnstoðir eða „hafnarmannvirki" ferðaþjónustunnar. Bættar samgöngur eru lykilatriði. Upplýsingamiðstöð og Látrabjargsstofa eru verkefni sem við eigum að setja á dagskrá á næstu árum. Þá er það mín trú að þjóðgarður hér á svæðinu að breskri fyrirmynd þar sem náttúruvernd, mannlíf og atvinnulíf vinna saman eigi að komast á dagskrá. Sú aðgerð myndi auka hagvöxt svæðisins umtalsvert.

Við eigum fjársjóð sem er algjört undraverk en það eru Látrabjarg í allri sinni dýrð og hinir gylltu sandar sem hér eru. Þá má ekki gleyma Arnarfirðinum og öllum þeim tækifærum sem þar má skapa.

Kæru íbúar!
Næstu ár verða erfið en élin eru ekki svo dimm, við sjáum stikuna framundan. Til að komast í gegnum þennan tíma þurfum við öll að standa saman sem eitt. Sýna metnað og vera stolt af því sem við höfum. Það er grunnurinn að bjartri framtíð og sterku samfélagi.