Í “ Klippt og skorið” í 24 stundum þann 21. des. sl. kom fram furðuleg fullyrðing um að Ólafur Egilsson “áhugamaður” um olíuhreinsistöð á Vestfjörðum hafi sótt um peninga til iðnaðarráðuneytisins vegna hagkvæmnisrannsókna fyrir olíuhreinsistöð. Svo er klingt út með að gárungar í iðnaðarráðuneytinu telji að Ólafur hafi farið húsavillt og eigi frekar að leita til bróður iðnaðarráðherra þar sem um huldumenn sé að ræða vegna þess að ekki hafi verið gefið upp hvaða stórfyrirtæki standi að baki hugsanlegri olíuhreinsistöð og hafi það verið gagnrýnt.

Þetta átti kanske að vera brandari, en ég veit ekki betur en allt sem sagt er hljóti að vera mjög málum blandið og réttu máli hallað, því rannsóknirnar nú á frumstigi málsins eru á vegum Fjórðungssambands Vestfirðinga og því ekki tilefni fyrir aðra til að leita eftir fé til þeirra.  Slíkur milliburður er heldur ekki blaðamanni til sóma (beva@24stundir.is).  Nema starfsmenn í iðnaðarráðuneytinu hafi sagt (ósatt) blaðamanni að svo væri. Kalla ég eftir staðfestingu viðkomandi starfsmanna, ef rétt er eftir þeim haft. Ég tel að hrein og klár skemmdarverk séu um að ræða, ef svo er. Hver ætti tilgangurinn annar að vera? Mér vitanlega hefur Ólafur Egilsson ekki sótt um fjármagn fyrir einu né neinu sem varðar hugsanlega olíuhreinsistöð á Vestfjörðum. Ég bið blaðamanninn að sanna að svo sé, ef ég er að fara með rangt mál.

Iðnaðarráðherra hefur sagt að ráðuneyti hans hafi lagt um 1,0 mkr. í upphafi skoðunar á möguleikum um reisingu olíuhreinsistöðvar. Það var ekki að beiðni forsvarsmanna Íslensks hátækniniðnaðar ehf. Iðnaðarráðuneytið vildi fylgjast með framvindu mála frá upphafi. Það óskaði eftir að fá að senda fulltrúa sinn á kynningarfund um málið á Ísafirði þann 22. maí sl. og fylgdi því svo eftir með því að fulltrúar Fjárfestingastofu sem starfar á vegum iðnaðarráðuneytisins, sáu um skipulagningu og fóru í ferð til skoðunar olíuhreinsistöðva í Evrópu, ásamt m.a. fulltrúum þeirra sveitarfélaga sem kom til greina við staðsetningu slíkrar stöðvar. Í því felst kostnaður iðnaðarráðuneytisins.

Í sambandi við gagnrýni sem blaðamaðurinn vitnar til um “huldumenn” vil ég spyrja hvort eðlismunur sé á að Össur Skarphéðinsson iðnaðarráðherra hafi einhvern rétt fram yfir aðra að t.d. upplýsa ekki hvaða fjárfestar (“huldumenn”) það eru sem hafa hug á að leita að olíu á Drekasvæðinu? Eða hversvegna bæjarstjórinn á Ísafirði taldi ekki tímabært að gefa upp hverjir væru að huga að vatnsútflutningi á Ísafirði á sínum tíma? Ég tel þetta vera mjög eðlilega viðskiptahætti. Menn vilja ná ákveðinni lendingu með mál áður en þeir upplýsa um aðild sína. Þannig er staðan með hugsanlega olíuhreinsistöð á Vestfjörðum. Allt í eðlilegum farvegi.

 

Dofri Hermannsson leikari og framkvæmdarstjóri þingflokks Samfylkingarinnar reynir að gera sér mat úr þessum annarlega pistli í 24 stundum með skrifum á bloggi sínu 21. des. sl. http://dofri.blog.is/blog/dofri/#entry-260269 .  Hann hefur einhverja sérstaka andúð á olíuhreinsistöð á Vestfjörðum, líklega undir yfirskini umhverfisverndar. Dofri grípur á lofti og stílfærir textann í “Klippt og skorið” og magnar upp vitleysuna. Telur “staðreynd að huldurisarnir hans Ólafs” skuli ekki eiga smáaura þ.e. 8,5 mkr. til að kosta forathuganir fyrir olíuhreinsistöð. Ja, ekki er öll vitleysan eins. Það hefur nefnilega aldrei komið fram hjá aðstandendum Ísl. hátækniiðnaðar ehf. að fyrirtækið tæki ekki þátt í þeim kostnaði. Þeir hafa einmitt öndvert sagt að sjálfsagt sé að taka þátt í kostnaði þegar liggur fyrir hvort af olíuhreinsistöð verður að veruleika á þeirra vegum.  Staðreyndin er hins vegar sú, að Fjórðungssamband Vestfirðinga samþykkti að gera forathuganir á sínum vegum vegna þess að þær upplýsingar sem fengjust nýttust ekki aðeins fyrir hugsanlega olíuhreinsistöð, heldur fyrir aðra atvinnuuppbyggingu. Mörg dæmi eru um slíkt og frekar venjan heldur en hitt.

Að maður í þeirri stöðu að vera framkvæmdastjóri þingflokks Samfylkingarinnar annars tveggja stjórnarflokka landsins, skuli leyfa sér að skrifa með þvílíkum dónaskap og vanþekkingu um menn og fyrirtæki eins og kemur fram í bloggi hans og um leið tala niður til okkar hér á Vestfjörðum, er til vansa. Bæði með þessum skrifum og skrifum á bloggi sínu í júlí sl. þar sem hann var fljótur til stóryrða þegar farið var í skynssamlega skoðunarferð til Evrópu. Skrifaði hann þá með háðung um að við værum að “windowsjoppa” olíuhreinsistöð. Það er augljóst að Dofri veit sáralítið um hvað málið snýst og hefur ekki aflað sér nægra upplýsinga. Á bloggi sínu  21. des., fullyrðir hann að flest sveitarfélög í Fjórðungssambandi Vestfirðinga muni vera talsvert minna en yfir sig hrifin af framtakinu, þ.e. að leita að peningum hjá iðnaðarráðuneytinu, sem ég veit að er rangt. Ég fullyrði að flest sveitarfélög í Fjórðungssambandinu eru ekki þessarar skoðunar. Því aðeins hafa þau tjáð sig á þeim nótum, að þau hafi fengið rangar upplýsingar. Ekki hefur neinn aðili haft samband við sveitarfélög á sunnanverðum Vestfjörðum í þessa veru. Vestfirðingar voru byrjaðir að skoða möguleikann á olíuhreinsistöð á svæðinu áður en holskeflur lokana fyrirtækja og skerðing á þorskveiðiheimildum komu til á vordögum og í sumar. Það er rangt að það hafi verið þess vegna sem farið var að huga að þessari atvinnuuppbyggingu. Vandinn var orðinn ljós löngu áður og bendi ég á að 2. febrúar sl. áttum við fulltrúar sveitarfélagana á Vestfjörðum fund með fulltrúum ríkisstjórnarinnar og var þá ákveðið að skipa svokallaða Vestfjarðanefnd þar sem ríksstjórninni var ljós hinn mikli vandi sem blasti við á Vestfjörðum.

Framkvæmdarstjóra þingflokks Samfylkingarinnar eiga að vera hæg heimatökin að afla réttra upplýsinga, nema að þessi skrif séu gerð gegn betri vitund og með einhverja aðra hagsmuni í huga. En hvaða þá? Ég skora á Dofra að svara og leiðrétta sín skrif og allar þær dylgjur sem komið hafa frá honum um aðstandendur Ísl. hátækniiðnaðar ehf. Dofri lýkur bloggi sínu 21. des. með því að benda á að Vestfirðingum sé nær að fylkja sér um vestfirskan háskóla heldur en að “elta olíupottinn undir regnboga”. Það sé raunverulegt og metnaðarfullt markmið. Ég tek undir það að sjálfsagt er að vinna að því að koma á fót háskóla á  Vestfjörðum. Hann yrði þá sjálfsagt settur niður á Ísafirði. Enn og aftur virðist Dofri ekki þekkja til. Hvernig eigum við hér á suðursvæði Vestfjarða að nýta okkur slíkan skóla þegar vegasamgöngur eru eins og þær eru í dag? Ég tel að með uppbyggingu atvinnustarfsemi eins og olíuhreinsistöðar, skapist forsendur til að hraða til muna umbótum á vegasamgöngum og opnist þá frekar möguleikar á hröðun m.a. stofnunar háskóla á Vestfjörðum.

Við munum berjast fyrir því olíuhreinsistöð rísi á Vestfjörðum, alveg sama hvort skriffinnar í 101 Reykjavík eins og Dofri eru því andvígir. Enda hafa þeir ekki áhyggjur af fólksflótta, en eins og kom fram í skýrslu um samfélagsáhrif sem gerð var fyrir Fjórðungssambandið í tengslum við fyrirhugaða olíuhreinsistöð, þá verða flestir fluttir frá Vestfjörðum eftir 50 ár ef ekkert verður gert.

Dofri talar digurbarkalega um að hann sé umhverfissinni. Það er gott að vera umhverfis- og náttúruverndarsinnaður. Við eigum að nýta landið okkar í sátt við umhverfið og náttúruna. En öfgar, offors og skilningsleysi eins og koma fram í skrifum Dofra, geta aldrei átt rétt á sér.

 

Ragnar Jörundsson bæjarstjóri Vesturbyggðar.

Umhverfis- og náttúruverndarsinni.                   

Ég nefndi það í síðustu (og fyrstu :) skrifum mínum að ég myndi segja frá kynnisferð okkar sveitarstjórnarmanna frá Ísafirði og Vesturbyggð til Rotterdam í Holllandi og Leuna í Þýskalandi til að skoða olíuhreinsistöðvar. Þótt seint sé vil ég í stuttu máli segja það, að það kom verulega á óvart hvernig starfsemi svona stöðvar er í raun. Ég fór fullur efasemda og fordóma gagnvart þessu fyrirbæri og sá fyrir mér skítuga starfsmenn útataða í olíu og mengun  þ.e. olía um allt.  En svo var nú alls ekki. Þetta kom mér og öllum sem fóru í þessa ferð mjög á óvart hve snyrtilegt allt var og hve íbúarnir sem bjuggu rétt fyrir handan girðingar svæðisins voru sáttir og ánægðir. Maður sá ekki neitt sem kallast getur mengun og græn gróðrarbeð og tré um allt svæðið. Þetta er mál sem við verðum að skoða út í hörgul. Staða þessa máls er sú í dag, að verið er að bíða eftir úttektarskýrslu um gróðurfar, fuglalíf, fornmynjar o.fl. á þeim tveimur jörðum sem koma til greina fyrir staðsetningu olíuhreinsistöðvar. Hún verður væntanlega tilbúin í október nk. 

Ágætu lesendur!
Til hamingju með nýja heimasíðu. Við vonumst til að þessi síða verði vinsæl og upplýsandi. Ég mun í þessari vefdagbók (bloggi) senda frá mér einhverjar línur og ég vona að bæjarfulltrúar nýti sér hana líka. Að þessu sinni er ég aðeins að prufa hvernig þetta virkar. Á næstu dögum langar mig að segja frá ferð okkar fulltrúa Vesturbyggðar sem fórum til Hollands og Þýskalands til að skoða olíuhreinsistöðvar. Í dag sendi bæjarráð frá sér ályktun þar sem samþykkt var að heimila áframhaldandi undirbúning um að reisa olíuhreinsistöð í Vesturbyggð. (Sjá fundargerð bæjarráðs nr. 426 undir "stjórnsýsla") Á næstunni verður málið kynnt íbúum og má benda á að þessi síða getur verið góður vettvangur til skoðanaskipta Ekki meira að sinni..