Kallað eftir aukinni þjónustu vegagerðarinnar

Bæjarráð Vesturbyggðar ályktaði um þá stöðu sem komin er upp í samgöngumálum á svæðinu. Ályktunin er eftirfarandi:

"Samkvæmt upplýsingum frá Eimskip, rekstraraðila Breiðafjarðarferjunnar Baldurs, er ljóst að vegna alvarlegar bilunar í vélbúnaði skipsins má þess vænta að rekstrarstöðvun ferjunnar verði ekki undir fjórum vikum. Útlit er fyrir að ekki verði leigð önnur ferja til að leysa Baldur af á meðan skipið er úr þjónustu.

Bæjarráð bendir á að á vetrum er Breiðafjarðarferjan Baldur lífæð samgangna fyrir sunnanverða Vestfirði. Bent er einnig á að umferð flutningabifreiða inn og útaf svæðinu er vikulega rúmlega 100 bílar auk annarra umferðar. Ljóst er, svo að ekki verði alvarleg röskun á samgöngum í landshlutanum með tilheyrandi tjóni og óþægindum fyrir fyrirtæki og íbúa, að auka verður verulega vetrarþjónustu á vegakerfi landshlutans. 

Bæjarráð krefst þess að nú þegar verði snjómokstur og hálkuvörn á vegakerfi landshlutans aukin verulega og að séð verður til þess að vetrarþjónustan miðist við að vegir verði opnir til a.m.k. 24:00 dag hvern á meðan að rekstrarstöðvun Breiðafjarðarferjunnar varir."

Samkvæmt Hreini Haraldssyni vegamálastjóra þá eru starfsmenn vegagerðarinnar að fara yfir stöðuna í samráði við hagsmunaaðila um hvernig unnt er að mæta þörfum samfélagsins, ekki síst þungaflutningum á meðan þetta ástand varir. 

Skrifaðu athugasemd:



Til baka
Vesturbyggð - Kt. 510694-2369 - Aðalstræti 63 - 450 Patreksfirði - Sími: 450 2300 - Fax: 456 1142 - Netfang: vesturbyggd@vesturbyggd.is