Útgáfuhóf — Ariel + Nautnir

Út koma bækurnar ARIEL eftir Sylviu Plath í þýðingu Móheiðar Hlífar Geirlaugsdóttur og NAUTNIR eftir Mario Bellatin í þýðingu Birtu Ósmann Þórhallsdóttur. Þýðendur lesa upp og boðið verður upp á súpu og brauð og kaffi á eftir.

ARIEL eftir Sylviu Plath á 60 ára útgáfuafmæli í ár en bókin kom fyrst út árið 1965, tveimur árum eftir að hún lést aðeins þrítug að aldri. Sylvia er ein allra þekktasta skáldkona 20. aldarinnar. Bókin er tímamótaverk í menningarsögunni, þar sem Sylvía skoðar þemu eins og sjálfsmynd, mannlegt ástand og náttúruna. Líf hennar og dauðdagi hefur hlotið goðsagnakenndan blæ mikið til vegna þessarar kraftmiklu ljóðabókar.

NAUTNIR eftir Mario Bellatin er kröftugur og stingandi ljóðabálkur þar sem hráblautur og gelaður raunveruleiki og yfirgengileg þráhyggja fyrir hreinleika renna saman á súrrealískan hátt í heimi þar sem hinir dauðu ráða ríkjum og ungur heimspekingur þráir að eignast heilagan hund.
Mario Bellatin er talinn einn áhugaverðasti samtímahöfundur Rómönsku-Ameríku um þessar mundir. Bókina prýða einnig ljósmyndir eftir listamanninn Önnu Maggý.

Bækurnar eru Riso-prentaðar og handsaumaðar á prentverkstæði Skriðu.

Prentverkstæði Skriðu er staðsett í verbúðinni við höfnina (á móti Odda).