Bæjarráð #55

Lögð fram til samþykktar loftlagsstefna Vesturbyggðar

Loftlagsstefnan var unnin af umhverfis- og loftlagsráði og tekur mið af þeim lögum sem um þær gilda, en sveitarfélögum er gert skyld að setja sér loftlagsstefnu.

Bæjaráð leggur til að aðgerðaáætlun verði unnin á komandi kjörtímabili, þegar betur liggja fyrir forsendur um fjármögnun, umfang og forgangsröðun aðgerða. Jafnframt er lögð áhersla á að innleiðing aðgerða taki mið af fjárhagslegu svigrúmi sveitarfélagsins hverju sinni og að forgangsröðun verkefna byggi á lögbundnum skyldum og þeim aðgerðum sem skila mestum ávinningi fyrir samfélagið.

Bæjarráð samþykkir loftlagsstefnuna og vísar henni áfram til staðfestingar bæjarstjórnar.

Beiðni frá Fjórðungssambandi Vestfirðinga um samþykki tillögu að Svæðisskipulagi Vestfjarða 2025-2050

Bæjarráð samþykkir framlagða tillögu að Svæðisskipulagi Vestfjarða 2025-2050 og vísar henni áfram til staðfestingar bæjarstjórnar.

Lagt fyrir minnisblað sviðsstjóra umhverfis- og framkvæmdasviðs um niðurstöður verðfyrirspurnar vegna sláttar og hirðingar í Vesturbyggð.

Bæjarráð hafnar öllum tilboðum sem bárust vegna verkefnisins. Samræma þarf tíðni slátturs á milli byggðakjarna.

Bæjarráð felur bæjarstjóra og sviðsstjóra umhverfis- og framkvæmdasviðs að vinna málið áfram og taka nauðsynlegar ákvarðanir um framhald þess.

Lögð fram bókun fjölskylduráðs varðandi húsnæðismál eldri borgara á Bíldudal. Þar er lagt er til að eldri borgarar fái húsnæðið þar sem leikskólinn Tjarnarbrekka var til húsa til afnota þegar það losnar.

Bæjarráð samþykkir að veita eldri borgurum á Bíldudal afnot af húsnæðinu þegar það losnar og felur bæjarstjóra að vinna málið áfram.

Lagt fram til kynningar minnisblað Hafnasambands Íslands vegna virðisaukaskattskyldu og tollfrelsis skemmtiferðaskipa.

Bæjarráð Vesturbyggðar lýsir yfir áhyggjum af þeim áhrifum sem afnám tollfrelsis og aukin skattlagning skemmtiferðaskipa í innanlandssiglingum getur haft á minni hafnir og þau svæði landsins sem byggja í auknum mæli á vaxandi en viðkvæmri ferðaþjónustu.

Fyrir minni hafnir geta breytingar sem þessar haft veruleg áhrif á ákvörðun skipafélaga um viðkomur, enda eru rekstrarforsendur og samkeppnisstaða slíkra hafna allt önnur en stærri áfangastaða. Þá hefur hver viðkoma skemmtiferðaskipa oft hlutfallslega mun meiri áhrif á atvinnulíf, verslun, þjónustu og tekjur sveitarfélaga á smærri stöðum.

Bæjarráð telur mikilvægt að stjórnvöld horfi sérstaklega til byggðasjónarmiða og þeirra áhrifa sem breytingar á skattlagningu og gjaldtöku geta haft á dreifingu ferðamanna um landið. Mikilvægt er að tryggja að regluverk og gjaldtaka stuðli ekki að frekari samþjöppun ferðaþjónustu á fáa staði heldur styðji áfram við uppbyggingu og atvinnusköpun í minni samfélögum um land allt.

Lögð fram til kynningar fundargerð 26. fundar svæðisskipulagsnefndar Vestfjarða

Lögð fram til kynningar fundargerð 997. fundar stjórnar Sambandsins frá 17. apríl 2026

Lagðar fram til kynningar fundargerðir 94., 95., 96. og 97. fundar stjórnar Samtaka sjávarútvegssveitarfélaga frá 23. janúar, 20. febrúar, 3. mars og 8. apríl 2026.

Lagt fram til kynningar fundarboð á aðalfund fulltrúaráðs Háskólaseturs Vestfjarða sem haldinn verður 22. mai nk.

Lögð fram til kynningar ársskýrsla Náttúrufræðistofnunar 2025