Heimastjórn Arnarfjarðar #24

Lögð fram drög að viðauka við framkvæmdaleyfi vegna ofanflóðavarna á Bíldudal, sem gefið var út 14. janúar 2026.

Viðaukinn tekur til lagningar 66 kV jarðstrengs (Bíldudalslínu) á um 1 km löngum kafla frá tengivirki Landsvirkjunar við Járnhól 8 að deiliskipulagsmörkum ofan Dalbrautar 58.

Í greinargerð gildandi deiliskipulags ofanflóðavarna er gert ráð fyrir að núverandi háspennulína verði færð í jörð samhliða framkvæmdum við varnarmannvirkin. Sá hluti strengsins sem liggur innan deiliskipulagsmarka fellur undir þegar útgefið framkvæmdaleyfi fyrir ofanflóðavörnunum.

Þar sem hluti lagnaleiðarinnar liggur utan deiliskipulagsmarka er þörf á viðauka við framkvæmdaleyfið vegna þess kafla.

Skipulags- og umhverfisráð fjallaði um málið á fundi sínum 28. október 2026 og gerði ekki athugasemdir við framlagða tillögu. Ráðið lagði til við heimastjórn Arnarfjarðar að viðaukinn yrði samþykktur og skipulagsfulltrúa falið að gefa hann út þegar breyting á Aðalskipulagi Vesturbyggðar 2018?2035 vegna legu Bíldudalslínu hefur tekið gildi og önnur skilyrði leyfisins hafa verið uppfyllt.

Heimastjórn Arnarfjarðar hefur farið yfir fyrirliggjandi gögn og afgreiðslu skipulags- og umhverfisráðs frá 28. október 2026.

Heimastjórnin samþykkir framlagða tillögu að viðauka við framkvæmdaleyfi vegna ofanflóðavarna á Bíldudal, sem tekur til lagningar 66 kV jarðstrengs (Bíldudalslínu) utan deiliskipulagsmarka ofanflóðavarna.

Heimastjórnin felur skipulagsfulltrúa að gefa viðaukann út þegar breyting á Aðalskipulagi Vesturbyggðar 2018-2035 vegna legu Bíldudalslínu hefur tekið gildi og önnur skilyrði leyfisins hafa verið uppfyllt.

Lögð fram tillaga að óverulegri breytingu á Aðalskipulagi Vesturbyggðar 2018-2035 vegna fyrirhugaðrar lagningar Bíldudalslínu í jarðstreng í tengslum við framkvæmdir við ofanflóðavarnir ofan Bíldudals, ásamt greinargerð og gátlista vegna mats á því hvort breytingin geti talist óveruleg.

Breytingin felur í sér að um 1,5 km kafli núverandi loftlínu verður lagður í um 2 km langan jarðstreng. Lega línunnar verður færð til á skipulagsuppdrætti til samræmis við fyrirhugaða staðsetningu ofanflóðavarnargarða.

Skipulags- og umhverfisráð fjallaði um málið á fundi sínum 28. október 2026 og taldi að breytingin gæti talist óveruleg samkvæmt 2. mgr. 36. gr. skipulagslaga nr. 123/2010. Ráðið samþykkti tillöguna fyrir sitt leyti og lagði til við bæjarstjórn Vesturbyggðar að hún yrði samþykkt og send Húsnæðis-, mannvirkja- og skipulagsstofnun til staðfestingar.

Heimastjórn Arnarfjarðar hefur farið yfir fyrirliggjandi gögn og afgreiðslu skipulags- og umhverfisráðs frá 28. október 2026.

Heimastjórnin tekur undir mat skipulags- og umhverfisráðs um að fyrirhuguð breyting á Aðalskipulagi Vesturbyggðar 2018-2035 geti talist óveruleg samkvæmt 2. mgr. 36. gr. skipulagslaga nr. 123/2010.

Heimastjórnin gerir ekki athugasemdir við tillöguna og tekur undir tillögu skipulags- og umhverfisráðs um að bæjarstjórn Vesturbyggðar samþykki breytinguna og sendi hana Húsnæðis-, mannvirkja- og skipulagsstofnun til staðfestingar.

Lagðar fram til kynningar umsagnir sem bárust við kynningu skipulagslýsingar vegna fyrirhugaðrar breytingar á Aðalskipulagi Vesturbyggðar 2018-2035. Breytingin tekur annars vegar til skilgreiningar á nýju afþreyingar- og ferðamannasvæði við Strengfell ofan Bíldudals og hins vegar stækkunar íbúðarsvæðis ÍB17 við Krossholt.

Skipulagslýsingin var kynnt frá 24. september til 22. október 2026 og bárust alls fimm umsagnir. Í umsögnunum komu meðal annars fram ábendingar um náttúrufar við Strengfell, forsendur íbúðaruppbyggingar við Krossholt, vatnamál, fornleifaskráningu og tengingar við vegakerfið.

Skipulags- og umhverfisráð fjallaði um málið á fundi sínum 28. október 2026 og samþykkti að vinna áfram að tillögu að aðalskipulagsbreytingu með hliðsjón af framkomnum umsögnum. Jafnframt verður leitað umsagna Náttúruverndarstofnunar og Umhverfis- og orkustofnunar.

Málið er lagt fram til kynningar hjá heimastjórn Arnarfjarðar.