Heimastjórn Tálknafjarðar #11

Daníel Jakobsson forstjóri Arctic fish sat fundinn undir þessum lið til að ræða áframhaldandi uppbyggingu í Norður-Botni.

Formaður bauð Daníel Jakobsson forstjóra Arctic fish velkominn á fundinn.
Daníel upplýsti um stöðu á endurbyggingu hússins hjá Arctic Smolt í Norður-Botni sem brann og þau verkefni sem þurft hefur að leysa í ferlinu. Einnig fór hann almennt yfir þau mál sem í gangi eru hjá Arctic fish í Tálknafirði og hvernig þau ganga.
Heimastjórn Tálknafjarðar þakkaði Daníel fyrir komuna og greinargóðar upplýsingar.

Valgerður Þorsteinsdóttir menningar- og ferðamálafulltrúi kom inn á fundinn til að ræða ýmsa viðburði og fyrirkomulag þeirra.

Valgerður fór yfir þá viðburði sem hefð hefur verið fyrir að halda í Tálknafirði og hvernig fyrirkomulagið hefur almennt verið með slíka viðburði í Vesturbyggð. Einnig fór hún yfir þá viðburði sem sveitarfélagið hefur komið að framkvæmd á hverjum tíma og stuðning sveitarfélagsins við slíka viðburði.

Valgerður Þorsteinsdóttir menningar- og ferðamálafulltrúi sat fundinn undir þessum lið til að upplýsa um stöðu mála varðandi tjaldsvæðið á Tálknafirði.

Valgerður fór yfir samning um rekstur tjaldsvæðisins í Tálknafirði og ræddi rekstrarfyrirkomulagið.
Heimastjórn leggur til að fá rekstraraðila tjaldsvæðisins inn á fund í ágúst til að ræða áherslur í fjárhagsáætlun varðandi uppbyggingu og viðhald tjaldsvæðisins á næstu árum.

Valgerður vék af fundi.

Viðhaldsþörf Tálknafjarðarhafnar og umsókn í samgönguáætlun

Heimastjórn Tálknafjarðar hvetur bæjarráð Vesturbyggðar til að leggja fram tillögur til samgönguáætlunar um að fá fjármagn í endurbætur á Tálknafjarðarhöfn við endurskoðun samgönguáætlunar.
Heimastjórn Tálknafjarðar bendir á að nauðsynlegt er að hefja vinnu við undirbúning og hönnun á stálþili sem mögulegt er að reka niður á norður/innri hlið bryggjunnar sem snýr inn í smábátahöfnina. Með slíku þili eykst öruggt legupláss fyrir meðalstóra báta, svo sem þjónustubáta, í Tálknafjarðarhöfn.
Jafnframt er minnt á að ástand þilsins á hafskipabryggjunni er orðið mjög slæmt og hætta getur skapast á þekjunni á bryggjunni vegna úrrennslis á burði í bryggjunni. Nauðsynlegt er að endurnýja þilið og þekjuna sem allra fyrst til að bryggjan nýtist sem best.
Áður hefur verið vakin athygli bæjarráðs á ástandi hafskipabryggjunnar, sjá 1. fund heimastjórnar frá 04.07.2024 auk bókunar frá sveitarstjórn Tálknafjarðarhrepps frá 2023.

Samþykkt samhljóða.

Skilti við gatnamót Tálknafjarðarvegar

Heimastjórn Tálknafjarðar ítrekar nauðsyn þess að skipulagi verði komið á skiltamál við gatnamótin að Tálknafirði. Heimastjórn leggur til að auglýsingaskilti fyrirtækja verði öll staðsett á planinu við háspennustöðina á Keldeyri þar sem gert er ráð fyrir slíkum skiltum. Einu skiltin sem verða áfram við gatnamótin verða þá vegvísunarskilti Vegagerðinnar sem vísa á Tálknafjörð. Einnig má huga því að uppsetning þeirra skilta sem á planinu verða sé snyrtileg og samræmd.

Samþykkt samhljóða.

Umgengni við hús og fyrirtæki í Tálknafirði

Heimastjórn Tálknafjarðar hvetur íbúa og fyrirtæki í Tálknafirði til að huga vel að viðhaldi og umhverfi húsa og fyrirtækja svo sómi sé að. Framundan er ferðamannatíminn og jákvætt að hús og umhverfi í Tálknafirði sé snyrtilegt þegar gestir okkar koma.

Samþykkt samhljóða.

Fjárhagsáætlun 2026, dagsetningar og tilhögun

Lagt fram til kynningar

Úrvinnsla úr ábendingum og málefnum frá íbúafundi og kaffispjalli, áherslur inn í fjárhagsáætlunargerð.

Forgangsröðun og umræðu vísað áfram til ágústfundar heimastjórnar.