Skipulags- og umhverfisráð #3

Lögð fram skipulagslýsing vegna fyrirhugaðrar breytingar á Aðalskipulagi Vesturbyggðar 2018-2035, dags. ágúst 2026. Breytingin fjallar annars vegar um að skilgreina nýtt afþreyingar- og ferðamannasvæði við Strengfell ofan Bíldudals vegna fyrirhugaðs áningar- og útsýnisstaðar og hins vegar um stækkun íbúðarsvæðis ÍB17 við Krossholt vegna einnar nýrrar íbúðarlóðar.

Skipulags- og umhverfisráð samþykkir fyrirliggjandi skipulagslýsingu með viðbótum þar sem gera skuli ráð fyrir fjórum nýjum lóðum í heildina á Krossholtum og felur skipulagsfulltrúa að kynna hana í samræmi við 30. gr. skipulagslaga nr. 123/2010 og leita umsagna HMS og annarra umsagnaraðila eftir því sem við á.

Erindi frá Andra Þ. Arinbjörnssyni, dags. 11. ágúst 2026. Í erindinu er óskað eftir að lóðarmörk fasteignarinnar að Aðalstræti 105 á Patreksfirði verði tekin til skoðunar og samræmd gildandi deiliskipulagi.

Samkvæmt gildandi deiliskipulagi er lóðin 625 m² að stærð en samkvæmt gildandi lóðarleigusamningi er hún skráð 549 m². Jafnframt er munur á afmörkun lóðarinnar samkvæmt uppdrætti deiliskipulags og lóðarleigusamningi.

Lóðarhafi óskar eftir að lóðin verði stækkuð og lóðargögn uppfærð til samræmis við afmörkun hennar í gildandi deiliskipulagi. Fram kemur í erindinu að fyrirhugað sé að bæta lóðarfrágang og afmörkun gagnvart aðliggjandi tjaldsvæði, meðal annars með gróðursetningu trjáa og runna.

Skipulags- og umhverfisráð tekur jákvætt í erindið og samþykkir fyrir sitt leyti að lóðarmörk Aðalstrætis 105 verði samræmd afmörkun lóðarinnar samkvæmt gildandi deiliskipulagi.

Ráðið felur byggingarfulltrúa að vinna að uppfærslu lóðargagna í samræmi við framangreint og undirbúa nýjan lóðarleigusamning.

Erindi frá landeigendum Láganúps, Kollsvík, L139899. Í erindinu er sótt um stofnun 3,51 ha lóðar úr landi Láganúps. Erindinu fylgir merkjalýsing dags. 9. júlí 2026. Ný lóð mun bera heitið Stóra Svarðarholt.

Skipulags- og umhverfisráð samþykkir stofnun lóðarinnar.

Erindi frá Loga ehf., dags. 14. júlí 2026, þar sem sótt er um stöðuleyfi fyrir gám utan við Hafnargötu 4b og 4d á Patreksfirði. Gámurinn er ætlaður undir vörulager fyrirtækisins.

Málið var áður tekið fyrir á 2. fundi skipulags- og umhverfisráðs þann 22. júlí 2026. Afgreiðslu málsins var þá frestað og byggingarfulltrúa falið að afla frekari upplýsinga frá umsækjanda um fyrirhugaða nýtingu gámsins, hvort um tímabundna eða varanlega ráðstöfun væri að ræða og, ef um tímabundna lausn væri að ræða, hver langtímaáform fyrirtækisins væru.

Viðbótarupplýsingar bárust frá umsækjanda þann 14. ágúst 2026. Þar kemur fram að gámurinn sé ætlaður undir vörulager. Jafnframt kemur fram að langtímaáform fyrirtækisins séu að efla og stækka starfsemina og að lögð sé áhersla á góða umgengni og snyrtilegt umhverfi. Umsækjandi tekur jafnframt fram að gámurinn falli að húsnæðinu og sé í sama lit og húsið.

Ráðið telur að stöðuleyfi fyrir gám eigi ekki að vera varanleg lausn á húsnæðis- eða lagerþörf starfsemi til lengri tíma. Svæðið sem um ræðir er ekki innan lóðar fasteignarinnar. Með vísan til framangreinds hafnar ráðið umsókninni.

Lagt fram til kynningar tölvupóstur frá Samtökum um dýravelferð með hvatningu um að taka afstöðu til loðdýraræktar í aðalskipulagi.