Framtíðarhúsnæði fyrir Bíldudalsskóla
Í vikunni var birt frumvarp til fjárlaga, þar sem m.a. er kveðið á um heimild fjármálaráðherra til að ganga til samninga við Vesturbyggð vegna ráðstöfunar Bíldudalsskóla vegna áformaðra framkvæmda við ofanflóðavarnir á svæðinu
Skrifað: 15. september 2023
Frá því í október 2022 hefur skólastarf í Bíldudalsskóla verði í tímabundnu húsnæði vegna raka og myglu í húsnæði Bíldudalsskóla við Dalbraut. Sveitarfélagið leitaði til umhverfis-, orku- og loftlagsráðuneytisins hvort ríkið væri tilbúið til að kaupa Bíldudalsskóla af sveitarfélaginu í staðin fyrir að byggja sérstakan varnargarð fyrir ofan Bíldudalsskóla. Allt væri þetta háð mati sveitarfélagsins á þeim kostum sem sveitarfélagið stæði frammi fyrir, að gera lagfæringar á húsnæðinu við Dalbraut eða byggja nýtt skólahúsnæði. Ef gerðar yrðu lagfæringar á húsnæðinu við Dalbraut yrði húsnæðinu jafnframt breytt þannig að það uppfyllti nútímakröfur skólastofnana.
Unnið hefur verið mat á kostnaði við lágmarkslagfæringar á skólahúsnæðinu á Dalbraut, þarfagreining unnin með kennurum og starfsfólki og kannaðir ólíkir kostir við útfærslu nýrrar skólabyggingar.
Nú þegar niðurstaða ríkisins liggur fyrir munu starfsfólk sveitarfélagsins og bæjarfulltrúar meta þá kosti sem eru í stöðunni og taka ákvörðun um framtíðarhúsnæði Bíldudalsskóla.
Gert verður ráð fyrir framkvæmdum við skólahúsnæði á Bíldudal á árinu 2024.
