Fyrirlestur fyrir foreldra í Skjaldborg
Mánudaginn 24. febrúar kl. 20:00–21:00 verður fyrirlesturinn Ég er ekki fullkominn haldinn í Skjaldborgarbíói, Aðalstræti 27, á Patreksfirði. Fyrirlesturinn er ætlaður foreldrum á sunnanverðum Vestfjörðum og þátttaka er ókeypis.
Í fyrirlestrinum er fjallað á einlægan og hvetjandi hátt um fullkomnunaráráttu, kvíða og sjálfsmynd. Rætt er um hvernig hægt er að stækka þægindaramma sinn, takast á við neikvætt sjálfstal og óraunhæfar kröfur og læra af mistökum til að byggja upp sjálfstraust og vellíðan. Málefnið snertir marga, bæði ungmenni og fjölskyldur þeirra, ekki síst innan íþróttahreyfingarinnar. Miðvikudaginn 25. febrúar verður fyrirlesturinn einnig haldinn fyrir nemendur í Patreksskóla og Bíldudalsskóla.
Viðburðurinn er hluti af fræðsludagskrá íþróttahéraða á Vestfjörðum í samstarfi við svæðisstöðvar íþróttahéraða.