Leik­skóla­stjóri

Vesturbyggð vinnur að innleiðingu nýs stjórnskipulags í leik- og grunnskólum sveitarfélagsins með það að markmiði að styrkja faglega forystu, efla samstarf og þróun skólastarfs og styðja betur við litlar rekstrareiningar í dreifðu sveitarfélagi. Í sveitarfélaginu eru reknir þrír grunnskólar með leikskóladeildum auk leikskóla. Í nýju skipulagi verður lögð aukin áhersla á faglega samræmingu og samstarf milli leik- og grunnskóla. Leikskólastjóri gegnir þar lykilhlutverki, bæði í daglegum rekstri leikskóla og í faglegri þróun leikskólastarfs í sveitarfélaginu.

Leikskólastjóri Vesturbyggðar ber ábyrgð á faglegri forystu og daglegum rekstri leikskólans Arakletts. Jafnframt hefur leikskólastjóri mikilvægt hlutverk í að styðja við og samræma leikskólastarf í sveitarfélaginu, þar á meðal leikskóladeildir við grunnskólana. Dagleg stjórnun leikskóladeilda verður áfram í hverjum skóla. Leikskólastjóri er hluti af stjórnendateymi skóla Vesturbyggðar og tekur virkan þátt í þróun skólastarfs í sveitarfélaginu.

Leikskólastjóri situr í stjórnendateymi ásamt stjórnendum hvers skóla, skólastjóra Vesturbyggðar, sviðsstjóra fjölskyldusviðs og fulltrúa stoðteymis.

Einstök náttúrufegurð prýðir sunnanverða Vestfirði og þar er ótal margt að sjá og upplifa. Í Vesturbyggð er öflugt atvinnulíf, fjölbreytt þjónusta og gott mannlíf. Góð þjónusta er í sveitarfélaginu, öflugt æskulýðsstarf, leikskólar, íþróttasvæði, verslanir, sjúkrahús, verkstæði, vélsmiðjur, trésmíðaverkstæði, bíó, ferðaþjónusta og fleira. Möguleikar til útivistar, félagsstarfa, íþrótta og afþreyingar eru fjölmargar. Vesturbyggð tekur vel á móti nýjum íbúum!