Móttökuáætlun fyrir nýja íbúa af erlendum uppruna
Sveitarfélagið hefur tekið í notkun nýja móttökuáætlun fyrir nýja íbúa af erlendum uppruna með það að markmiði að bæta upplýsingagjöf og auðvelda nýjum íbúum að nálgast helstu upplýsingar um þjónustu og samfélagið. Meðal þess sem nú er aðgengilegt er ný upplýsingasíða með helstu upplýsingum um fyrstu skrefin á Íslandi, ásamt gagnvirku korti sem sýnir helstu þjónustu í sveitarfélaginu.
Móttökuáætlunin felur annars vegar í sér sérstakt upplýsingabréf sem sent er til allra nýrra íbúa af erlendum uppruna þegar þeir flytja í sveitarfélagið. Þar eru teknar saman helstu praktísku upplýsingar sem geta komið að gagni fyrstu vikurnar og mánuðina eftir flutning.
Hins vegar hefur verið opnuð ný upplýsingasíða á heimasíðunni, Welcome to Vesturbyggð, þar sem safnað hefur verið saman fjölbreyttum upplýsingum fyrir nýja íbúa. Þar má meðal annars finna upplýsingar um fyrstu skrefin á Íslandi, húsnæði, heilbrigðisþjónustu, stéttarfélög og réttindi starfsmanna, skólakerfið, félagsþjónustu og íslenskukennslu. Hlekkur á síðuna er neðst í þessari frétt.
Sérstök áhersla er lögð á gagnvirkt rafrænt kort sem er aðgengilegt á síðunni. Kortið sýnir helstu þjónustu og mikilvæga staði í sveitarfélaginu á myndrænan og einfaldan hátt, sem getur auðveldað nýjum íbúum að rata og kynnast nærumhverfi sínu. Kortið er hægt að vista í síma.
Með verkefninu er stefnt að því að bæta upplýsingagjöf, styrkja aðgengi að þjónustu og auðvelda nýjum íbúum að taka þátt í samfélaginu allt frá fyrstu dögum.