Nýtt byggðarmerki vann FÍT verðlaunin
Nýtt byggðarmerki sveitarfélagsins hlaut gullverðlaun í flokki firmamerkja á FÍT verðlaunaafhendingunni 2026. Verðlaunin eru mikill heiður og staðfesting á gæðum merkisins og þeirri hugsun sem að baki því liggur. Hönnuðum merkisins er óskað innilega til hamingju með þennan glæsilega árangur.
Merkið hönnuðu Hörður Lárusson, Davíð Arnar Baldursson og Saga Guðnadóttir hjá hönnunarstofunni Kolofon.
Rökstuðningur dómnefndar
Einstaklega vel leyst, bæði í svarthvítu og lit og heldur styrk sínum í ólíkum birtingarmyndum. Myndmálið er skýrt og talar sannfærandi inn í sögulegt samhengi. Framúrskarandi lausn, hönnuð inn í þröngan ramma en útfærslan heppnast afar vel.
Merkið hönnuðu Hörður Lárusson, Davíð Arnar Baldursson og Saga Guðnadóttir hjá hönnunarstofunni Kolofon.
Lýsing höfunda
Byggðarmerkið er leikur að sjónrænu formi, sem bæði minnir á öldur og er um leið teikning af firði á milli fjallahlíða.
Úr forminu má einnig lesa bókstafinn V, sem tilvísun í nafn sveitarfélagsins.
Merkið kinkar enn fremur kolli til þess merkis sem er talið vera elsta skjaldarmerki Íslands, frá 1258. Merkið var þverröndótt með 6 bláum röndum á silfurskildi.
Hönnunarsamkeppni
Í kjölfar sameiningar Vesturbyggðar og Tálknafjarðarhrepps var ákveðið að efna til opinnar hönnunarsamkeppni um nýtt byggðarmerki. Keppnin fór fram í nafnleynd og alls bárust 56 tillögur. Dómnefnd hönnunarsamkeppninnar, skipuð af Birtu Ósmann Þórhallsdóttur, Greipi Gíslasyni og Guðmundi Oddi Magnússyni, samþykkti samhljóma að leggja til við bæjarstjórn að tillaga nr. 67278 yrði gerð að nýju byggðarmerki sveitarfélagsins. Tillagan var samþykkt á 15. fundi bæjarstjórnar þann 20. ágúst 2025.
Greipur Gíslason, Birta Ósmann Þórhallsdóttir og Guðmundur Oddur Magnússon.
Úr rökstuðningi dómnefndar
[…]
Horft er út fjörð þar sem sjóndeildarhringurinn víkkar. Framundan er óendanleikinn. Áhorfandinn stendur í skut skips og horfir á kjölfar þess sem myndast á haffletinum – hann er á heimleið.
Táknmál merkisins lítur ekki til þriggja eða fleiri samfélagshluta heldur myndar heild og möguleikarnir eru óendanlegir.
[…]
Merkið er skilmerkilegt, skýrt og einfalt en býður upp á mismunandi túlkanir. Sífleiri myndir birtast því lengur sem horft er á það. Merkið samræmist öllum meginkröfum um byggðarmerki að formi og lögun.
