Nýtt gjald á fyrirtæki
Við vinnu við fjárhagsáætlun 2024 tók bæjarstjórn Vesturbyggðar ákvörðun um að leggja á gjald á fasteignir fyrirtækja og stofnanna í Vesturbyggð. Gjaldið heitir Rekstur grenndar- og söfnunarstöðva – fyrirtæki og er 55.726 fyrir árið 2024 og er gjaldið innheimt með fasteignagjöldum.
Skrifað: 1. febrúar 2024
Vesturbyggð stendur undir ýmsum föstum kostnaði vegna fyrirtækja eins og rekstur á gámasvæðum og öðrum föstum kostnaði sem ekki telst eðlilegt að heimilin standi ein undir.
Gjaldið er ekki ætlað til að standa undir sorphirðu hjá fyrirtækjum og stofnunum og ber þeim að gera samning við þjónustuaðila um hana.
Í lögum um meðhöndlun úrgangs nr. 55/2003 kemur fram að rekstraraðilum sé skylt að flokka rekstrarúrgang, jafnframt segir í sömu lögum að innheimta skuli gjald fyrir förgun úrgangs. Gjaldið skal nægja fyrir öllum kostnaði við förgun úrgangsins, þ.m.t. uppsetningu og rekstur viðkomandi förgunarstaðar. Sveitarfélagi er heimilt að ákveða gjaldið sem fast gjald á hverja fasteignareiningu sem má vera 50% af heildarkostnaði sveitarfélagsins til 1. Janúar 2025 eftir það má fastur kostnaður ekki vera hærri en sem nemur 25% af heildarkostnaði.