Skólareglur og skýr mörk
Samskipta- og umgengnisreglur þessar eru grundvallaðar á leiðarljósi Patreksskóla en einnig hugmyndafræði uppbyggingarstefnunnar og Heillaspora. Jafnréttisáætlun skólans er einnig lögð til grundvallar í skólastarfinu.
Uppbyggingarstefnan byggir á kenningum um hæfni einstaklings til sjálfstjórnar, hæfni hans til að tengja saman persónuleg lífsgildi og þann veruleika sem hann býr við. Hún kennir sjálfstjórn, sjálfsaga og eflir hæfni hans til að taka ábyrgð á eigin orðum og gjörðum. Lögð er áhersla á að byggja einstaklinginn upp, að hann þekki þarfir sínar og uppfylli þær án þess að skaða aðra.
Heillaspor er heildræn nálgun til að styðja við farsæla þátttöku barna í skóla- og frístundastarfi. Heillaspor styðja við innleiðingu á tengla- og áfallamiðaðri nálgun í inngildandi skóla- og frístundastarfi. Heillaspor styðja við skólaþróun þar sem fræði og starfshættir á vettvangi eru tengd saman í gegnum sex leiðandi vörður Heillaspora.
Markmið skólareglna er að skapa góðan skólabrag og jákvæð og uppbyggileg samskipti og allir nemendur geti notið hæfileika sinna og séu öruggir í starfi skólans. Skólareglur þessar eru hluti af stefnu Patreksskóla í umgengi og samskiptum. Þær gilda í öllu kennslusvæði skólans, á skólalóð, í ferðalögum og á viðburðum sem skólinn stendur fyrir.
Gildi
Í Patreksskóla er stuðlað að jákvæðum skólabrag þar sem unnið er með sameiginlega sýn að leiðarljósi sem felst einkum í eftirfarandi gildum:
Jákvæðni. Við erum jákvæð og bjartsýn og höfum gleðina að leiðarljósi. Við stuðlum að góðum skólabrag.
Virðing. Við erum skilningsrík, umburðarlynd og hreinskilin og gætum ávalt trúnaðar. Við líðum ekki fordóma. Við berum virðingu hvert fyrir öðru.
Samvinna. Við erum samhent og eflum hvert annað. Við viljum jafnrétti og lýðræðisleg vinnubrögð. Við vinnum saman að lausn verkefna.
Markmið
Markmið með skólareglum þessarar er að:
- nemendur geti notið bernsku sinnar í skólastarfi, notið hæfileika sinna og séu öryggir í öllu starfi á vegum skólans,
- stuðla að ábyrgð nemenda á eigin námi, hegðun og samskiptum með hliðsjón af aldri, þroska og aðstæðum að öðru leyti,
- allir í skólasamfélaginu kappkosti í sameiningu að stuðla að og viðhalda góðum starfsanda og jákvæðum skólabrag, þar sem öryggi, vellíðan og heilbrigði eru leiðarljós,
- stuðla að góðu samstarfi og samráði milli foreldra og skóla um nám nemenda, hegðun og samskipti og stuðla að gagnkvæmu trausti allra aðila í skólasamfélaginu, gagnkvæmri virðingu, samábyrgð, kurteislegri framkomu og tillitssemi,
- haldið sé uppi námsaga þar sem tekið er tillit til þarfa nemenda, þroska og hæfni þeirra, með áherslu á mannréttindi, jafnrétti, lýðræðisleg vinnubrögð og bann við mismunun af öllu tagi,
- hver grunnskóli setji sér skólareglur með skýrum viðbrögðum við brotum á reglunum, að úrræði og viðbrögð stuðli að jákvæðri hegðun og miði að því að rækta persónuþroska og hæfni nemenda.
(Reglugerð um ábyrgð og skyldur aðila skólasamfélagsins í grunnskólum nr. 1040)
Almennar umgengnisreglur
Við berum ábyrgð á eigin hegðun og framkomu
- Við komum fram af kurteisi og sýnum tillitssemi í samskiptum við alla í skólanum, einnig í rafrænum samskiptum og netnotkun.
- Við göngum vel um bæði úti og inni og förum vel með eigur skólans, eigin eigur og annarra. Nemendur bera ábyrgð á því tjóni sem þeir kunna að valda á eigum skólans, starfsmanna eða annarra nemenda.
- Við göngum snyrtilega um og stuðlum að sjálfbærni í skólanum okkar. Allir borða hádegismatinn sinn í matsalnum.
- Heimilt er að vera í snjókasti á afmörkuðu svæði á fótboltavelli milli bygginga.
- Við truflum ekki kennslustundir hjá öðrum.
Við klæðumst viðeigandi fatnaði í starfinu innandyra sem og utandyra
- Gengið er frá skóm og yfirhöfnum á viðeigandi stöðum.
Patreksskóli er símalaus skóli, við sýnum ábyrgð við notkun snjalltækja og leggjum þau til hliðar við upphaf kennslustunda
- Við sýnum ábyrgð við notkun snjalltækja og leggjum þau til hliðar við upphaf kennslustunda
- Slökkt skal vera á síma eða hann á þeirri stillingu að hann trufli ekki.
- Snjallsímanotkun í kennslustundum er háð leyfi kennara.
- Tæki í eigu nemanda er alfarið á hans ábyrgð
Við ástundum heilbrigðar lífsvenjur, snæðum holla fæðu og hreyfum okkur reglulega
- Við höfnum neyslu ávanabindandi efna svo sem tóbaks, nikótíns, áfengis og fíkniefna.
- Skólanesti á að vera hollt og gott og í takt við leiðbeiningar embættis landlæknis sem er að finna hérna. Mælst er til að foreldrar sendi börn sín í skólann með fjölnota umbúðir (forðast fernur og plastpoka).
- Nemendum er ekki leyfilegt að neyta sælgætis eða gosdrykkkja í skólanum nema með sérstöku leyfi kennara.
Við mætum stundvíslega í skólann og stundum nám af kappi í kennslustundum
- Góð ástundun er ávísun á að nemandi nái sínu besta úr skólagöngu sinni. Ætlast er til þess að nemendur í 1.-7. bekk séu í skólabyggingunni eða á skólalóð á skólatíma og það er óheimilt yfirgefa skólalóð á skólatíma án leyfis. Undanskildar eru ferðir í íþróttahús, sundlaug og vettvangsferðir.
- Við berum virðingu fyrir tíma annarra og mætum á réttum tíma í kennslustundir.
Reiðhjól og hjólatæki
- Reiðhjól og önnur hjólaleiktæki eru alfarið á ábyrgð nemenda og forráðamanna þeirra, einnig er það á ábyrgð forráðamanna að nemendur noti viðeigandi öryggisbúnað. Nemendur eiga að nota hjálm komi þeir á reiðhjólum eða hjólaleiktækjum í skólann. Ekki er leyfilegt að nota hjólatæki á skólalóð á skólatíma nema á skilgreindu svæði.
Viðbrögð við brotum á skólareglum
Í Patreksskóla setjum við skýr mörk á milli þeirrar hegðunar sem er æskileg og þeirrar hegðunar sem ekki er hægt að sætta sig við. Allir geta gert mistök í hegðun, umgengni og samskiptum. Það gildir um nemendur og starfsmenn Patreksskóla.
Ábyrgð, réttindi og skyldur nemenda
Nemendur skulu sækja grunnskóla nema veikindi eða önnur forföll hamli.
Nemendur bera ábyrgð á eigin námi, framkomu sinni, háttsemi og samskiptum við skólasystkin og starfsfólk skóla, þ.m.t. rafrænum samskiptum og netnotkun með hliðsjón af aldri og þroska þeirra.
Nemendur eiga rétt á að láta skoðanir sínar í ljós í málum sem þá varðar og skal tekið réttmætt tillit til skoðana þeirra. Nemendum ber að hlíta fyrirmælum kennara og starfsfólks skóla, fara eftir skólareglum og fylgja almennum umgengnisreglum í samskiptum við starfsfólk og skólasystkin.
Nemanda skal gefinn kostur á að tjá sig ef fundið er að hegðun hans vegna brota á skólareglum.